شوران و ایب و کیب اٹی طوفانی پِر و نوکاپ بھسکاری کرے، کیہی علاقہ غاتے دیر ہرفے،  مخلوق نا گزربسر نا سیبو ہندا کشاری ڈغارتا سالانہ پیدوار آن مریک ہنداخاطرآن المی ءِ کہ اخس کہ زوت مننگ کرے کشاری بشخ انا بحالی کن ہلہلہ ئی گام گیج کننگے، بلوچستان اسمبلی ٹی پاکستان تحریک انصاف نا پارلیمانی لیڈر سردار یارمحمد رند

کوئٹہ۔ 15جولائی (اے پی پی) شوران و ایب و کیب اٹی طوفانی پِر و نوکاپ بھسکاری کرے، کیہی علاقہ غاتے دیر ہرفے، سدآ کچہ انگا ہند آک تمار، مواصلات نا نظام درہم برہم و رابطہ سڑک آتیا دیر بننگ آن شوران نا رابطہ ایلو شارتیان کشکنگانے۔ بلوچستان اسمبلی ٹی پاکستان تحریک انصاف نا پارلیمانی لیڈر سردار یارمحمد رند رابطہ کننگ آ شوران و ایب وکیب اٹ مروک آ بھسکاری ءِ پک کرینے۔ ”اے پی پی“ تون گپ وتران کرسا اوپارے کہ پِر و نوکاپ آن علاقہ ٹی بھلو کچ اسے آ بھسکاری مسنے کشاری بندآک، گنڈھاک، و آوار ڈغارک نوکاپ نا گواچی مسنو، ساہدار تا بھلو کچ اسے ٹی کہینگ تون اوار اوار کچہ انگا آبادی تا تمنگ آن مخلوق نا اسہ بھلو کچ اس بے اُرامسنے۔ سردار یارمحمد رند پارے کہ زہمی علاقہ غاتے ٹی داتم اسکان ہچ ءُ خاطرخواہ ریسکیو یاریلیف سرجزآتا بنامتنے و زہمیک بھاز مشکل آتون مون تننگ ءُ اوپارے کہ شوران و ایب وکیب انا علاقہ غاتے ٹی حالیت آک سنگین ءُ تدوک آ پِر ونوکاپ نا بھسکاری تے وزیراعلیٰ بلوچستان تینٹ خنانے داتم اسکان تدوک آ بھس کاری آن بحالی متویسس کہ داسہ اسہ اوار ولدا پِر ونوکاپ آن علاقہ ٹی بھلو کچ اسے آ نسخان مسنے۔ سردار یارمحمد رند پارے کہ مخلوق نا گزربسر نا سیبو ہندا کشاری ڈغارتا سالانہ پیدوار آن مریک ہنداخاطرآن المی ءِ کہ اخس کہ زوت مننگ کرے کشاری بشخ انا بحالی کن ہلہلہ ئی گام گیج کننگے ورنہ زرگزرانی کسمپرسی نا سوب آن مخلوق نا اسہ بھلو کچ اس ہمپنگ آ بیوس مریک۔ اوپارے کہ بیرہ پنچ کلو نت و اِراکلو بورہ اٹ مخلوق نا ریلیف ممکن اف مخلوق نا ذریعہ معاش نا بحالی ءِ پک کروئی مریک۔ اوپارے کہ ہڑدے ئی زند انا بحالی کن ہلہلہ ئی بنداوتیا مواصلات نا ذریعہ و رابطہ سڑک آتا جوڑ جاڑ المی ءِ۔