اسلام آباد۔6جولائی (اے پی پی): بلوچستان حکومت ءِجارچین لیاقت شاہوانی ءَ گشتگ کہ سندھ ءِ نیمگ ءَ چہ بلوچستانءِ آپ دُزی کنگ بوہگ ءَ اِنت ، اگاں گیش دزی کنگ بوت گڑا ما حب ڈیم ءَ چہ کراچی ءِ آپ دیئگ ءَ بند کناں۔ سے شمبے ءِ روچءَ بلوچستان ہاؤس اسلام آباد ءَ پریس کانفرنس ءَ گوں تران کنان ءَ آئی ءَ گشتگ کہ بلوچستان حکومت ءَ گوستگیں حکومت گوستگیں سیئں سالاں مزنیں مزنیں پراجیکٹس بندات کتگ اَنت۔ بلوچستان ءِ راج دپتر ءِ تہا اولی کینسر ءِ نادراہ جاہ، میڈیکل ایمرجنسی رسپانس سنٹر، نوکیںوانگ جاہ ، وانگ جاہ آنی اپ گریڈیشن، صوبہ ءِ تہا گڈگورننس ءَ ہوار بازینانی احتساب کنگ بوتگ، بنجاہ ءِ دلگوشی ءُ ہمراہ دا ری ءَ چہ آ بلوچستان کہ گوستءَ ڈالچار ءُ زھبار کنگ بوتگ نوں دیمروئی ءِ نیمگ ءَ رہادگ اِنت۔ اے حکومت ءَ بلوچستان ءِ دیمروئی ءِ سرءَ دلگوشی کتگ ، انوں بلوچستان ءَ را گوں بنجاہ ءَ ایچ جیڑہ نیست بلکیں سندھ حکومت ءِ گوما اِنت ، سندھ حکومت بلوچستان ءِ سبزیں سرڈگارءَ را حُشک ءُ ویریندان کنگ ءِ گامگیج چست کتگ۔ آئی ءَ گشتگ کہ ارساءِ آپ بلوچستان ءَ را سندھ ءِ وسیلگءَ چہ رسیت، 1991 ءَارسا منءُ گر کنگ بوتگ، گوستگیں بیست سالاں سندھ حکومت ءَ کدی ہم مئے بہر ناداتگ، اے وہدءَ سندھ پنجاپ ءَ چہ 17 درسد آپ ءِ کمی ءِ گلہ ءَ کنگ ءَ اِنت بلے دیما بلوچستان ءَ را سندھ حکومت 42 درسد شارٹ فال ءِ سرءَ آپ دیئگ ءَ اِنت۔ بلوچستان ءِ ارساءِ تہا بہر 10 ہزار 9 سد کیوسک اِنت، بلے بلوچستان ءَ را اے وہد ءَ سندھ ءَ چہ تنا 7 ہزار کیوسک آپ رسگ ءَ اِنت۔ کہ ایشی ءِ تہا 5 سد کیوسک کچی کینال ءَ چہ وہدے کہ 4 ہزار 583 کیوسک پٹ فیڈر ءَ چہ رسگ ءَ اِنت۔ آئی ءَ گشتگ کہ گوستگیں دو ماہانی تہا بلوچستان ءِ آپ ءِ ہوالگءَ چہ 42 درسد حق جنگ بوہگ ءَ اِنت۔ ارسا منءُ گر ءِ ردءَ آپ ءِ کمی ءَ ابید سندھ کے پی کے ءُ بلوچستان ءَ را آ پ دیئگ ءِ پابند اِنت۔ اے من ءُ گر ءِ تہا نبشتہ اِنت کہ کجام ہم شارٹ فال ءَ چہ کے پی کے ء ُ بلوچستان ءَ را کار نیست۔ بلے اے من ء ُ گرءَ را سندھ حکومت منگءَ نااِنت۔ آئی ءَ گشتگ کہ وہدے بلوچستان حکومت ءَ آپ کمی منءُ گر ءِ سرءَ سندھ ءِ سروزیرمراد علی شاہ ءَ گوں شکایت کتگ گڑا آئی ءَ اے بابت ءَ مکن کتگ ء ُ گشتگ کہ آ بلوچستان ءَ را سرجمی ءَ آپ نادنت۔ آپ ءِ کمی ءَچہ بلوچستان ءِ دھکاناں اے سال ءَ 75 تاں 77 ارب کلدار ءِ نقصان بوہگءَ اِنت۔ اے نقصان سندھ حکومت ءِ نامنگ ءُ کستءُ کینگ ءَ چہ بوہگ ءَ اِنت۔ 1991 ءِ ا رسا من ءُ گرءَ پد تاں انوں آپ ءِ کمی ءِ سوب ءَ بلوچستان حکومت ءَ را 27 سد ءَ چہ 28 سد ارب کلدار ءِ نقصان بوتگ کہ ایشی ءِ زمہ وار سندھ حکومت اِنت۔ آئی ءَ گشتگ کہ ما بازیں فورم آں سندھ حکومت ءَ را وتی اے جیڑہ گشتگ۔ مئے محکمہ اے جیڑہ ءِ سرءَ وہدے سندھ حکومت ءَ گوں نزیکی کنگ ءِ کوشست کنت گڑا مئے ٹیلیفون ءَ کس چست ناکنت۔ آئی ءَ واپڈا ءَ گوں لوٹ کتگ کہ آ اے جیڑہ ءَ را گیش ءُ گیوار کنگ ءَ وتی کردءَ پیلو بہ کنت۔ بلوچستان ءِ بہر آئی ءَ را دیئگ بہ بیت۔ لیاقت شاہوانی ءَ گشتگ کہ تونسہ بیراج ءَچہ بلوچستان ءَ را ہمک سال 5 سد کیوسک آپ رسیت کہ ہمک سال سرجم ءَ دیئگ بیت۔ مارا اے بابت ءَ کدی ہم شکایت نابوتگ وہدے کہ دومی نیمگ ءَ سندھ حکومت جمہوریت ءُ بلوچستان ءَ را وتی سسٹر پراونس گشیت بلے گوستگیں بیست سالاں آ مئے آپ ءِ حقءَ جنگ ءَ اِنت۔ آئی ءَ گشتگ کہ بلوچستان ءِ نصیر آباد ڈویژن ءَ کشتءُ کشاری ءُ پہ ورگ ءِ ھاترءَ آپ نیست مردم زھرشانی کنگءَ اَنت۔ سندھ ءِ زمیندار غیر قانودی پمپس جنگ ءُ پہ وتی کشارانی ھاترءَ آپ برگءَ اَنت۔ آئی ءَ گشتگ کہ ما اُمیت کناں کہ ارسا من ءُ گر ءِ ردءَ کہ بلوچستان ءِ حق اَست اِنت مارا مئے آپ ءِ حق ءَ دنت۔
