ہڑتوم آ ملک آتا نیام اٹ ہڑتوم آکنڈآتا تعلقداری تے پین سوگو کننگ نا خیال آتا درشان
اسلام آباد۔ 28 مارچ (اے پی پی) قومی اسمبلی نا اسپیکر ایاز صادق نا سروکی ٹی پارلیمانی ڈل ترک وزیراعظم بن علی یلدرم تون اوڑدہی کرے ہراٹی ہڑتوم آ ملک آتا نیام اٹ ہڑتوم آ کنڈآتا تعلقداری تے پین سوگو کننگ، اقتصادی و راجی بشخ آتیٹی کمکاری ٹی مون آ دننگ تون اوار تین پہ تینی است خواہی نا معاملہ غاتیا خیال آتا درشانی ئِ کریر۔ قومی اسمبلی سیکرٹریٹ نا رداٹ اسپیکر ایاز صادق نا سروکی ٹی پارلیمانی ڈل ترکی نا چار دے ئی سرکاری دورہ غاٹی ئُ۔ داوخت آ پاکستان نا پارلیمانی ڈل ترک وزیراعظم تون اوڑدہی کرے ہراٹی ہڑتوم آ کنڈآتا معاملہ غاتون اوار ہڑتوم آ ملک آتا نیام اٹ تین پہ تینی واپار و اقتصادی کمکاری نابشخ آتیٹی کمکاریئِ پین ودیکی تننگ آ اتفاق کننگا۔ ہڑتوم آ کنڈآتیان فری ٹریڈ ایگریمنٹ (ایف ٹی اے) نابابت پیش رفت آ است جمی نا درشانی کننگا و اومیت ظاہر کننگا کہ دا معاہدہ زوت طے مریک۔ دا معاہدہ نا پوروی آن پد ہڑتوم آ ملک آتا نیام اٹ واپار و اقتصادی کمکاری ٹی شریداری ٹی نمان گچینی بریک و دا معاہدہ ہڑتوم آ ملک آتا سروک آتا وژن نا شاہدی ئِ۔ ترک وزیراعظم بن علی یلدرم داوخت آ ڈل اتون ہیت وگپ کرسا 23مارچ آ یوم پاکستان نا بابت مبارکبادی ترسا داہیت آ زورشاغا کہ ترکی پاکستان ئِ اسہ حقی ئُ برادر ملک اس تکک۔ اوخاص کر ملکی سوگوی نا بابت پاکستانی سروک نا کوشست آتا ستائِ کرے و اوپاکستان نا الس ، پارلیمنٹ و سیاسی سروک آتا کنڈآن 15جولائی 2016ءآ ترکی ٹی سنگین بغاوت نا وخت آ یکجہتی نا درشانی کننگ آ منت واری ءِ اداکرے۔ اووزیراعظم محمد نواز شریف نا ساڑی آ دورہ ترکی نا حوالہ ئِ ترسا پارے کہ انفراسٹرکچر ، تین پہ تینی زرکاری ، مواصلات، جان جوڑی، ذرائع ابلاغ و دودوربیدہ تون اوار تین پہ تینی شونداری نا ایلو بشخ آتیٹی کمکاری نا بابت کافی پیش رفت مسنے۔ داوخت آ اسپیکر قومی اسمبلی سردار ایاز صادق ترک وزیراعظم نا کنڈآن خیر سگالی نا جوزہ غاتا درشانی آ منت واری ئِ ادا کرے و پارے کہ پاکستان و ترکی نا نیام اٹ تعلقداری مثالی نوعیت نا ئِ، ہرافتے ٹی دے پہ دے گہرائی و ودیکی ودی مننگ ئِ۔ اوڑدہی ٹی پاکستانی ڈل اٹی اوار باسک قومی اسمبلی محمد پرویز ملک ، شگفتہ جمانی، سیما محی الدین جمیلی، طاہرہ اورنگزیب ، شائستہ پرویز ملک، مجاہد علی، سید امیر شاہ جاموٹ و شیخ صلاح الدین آن بیدس ترکی ٹی پاکستان نا سفیر سہیل محمود ، سیکرٹری قومی اسمبلی عبدالجبار علی تون اوار ایلو بڑزکو افسرآک ہم ساڑی ئسر۔
