درملکی تے ویزہ غاتا جاری کننگ کن بنجائی ڈیجیٹل ڈیٹا بینک اس اڈتننگے، سینٹرل ڈیجیٹل بینک و ویزہ غاتا جاری کننگ نا میکنزم آن پاکستان آ بروک آ غٹ درملکی تیا نظر شاغنگ اٹی کمک رسینگک
وزیر داخلہ چوہدری نثارعلی خان نا دیوان آن تران
اسلام آباد۔ 27مارچ (اے پی پی) وزیر داخلہ چوہدری نثارعلی خان نادرا ءِ پارت کرینے کہ مچ آ دنیا ٹی پاکستانی مشن آن درملکی تے ویزہ غاتا جاری کننگ کن بنجائی ڈیجیٹل ڈیٹا بینک اس اڈتننگے۔ داڑآن پاکستان نا سفر ءِ کروک آ درملکی تے آن لائن ویزا پائنٹمنٹ نا آسراتی دوئی مریک و نظام اٹی شفافیت بریک۔ وزیر داخلہ چوہدری نثارعلی خان نا کماشی ٹی دوشنبے نا دے بڑزکو کہولی دیوان اس مس ہراٹی سیکرٹری داخلہ، چیئرمین نادرا، ڈائریکٹر جنرل ایئرونگ و وزارت داخلہ نا سینئر کمامدارآک ساڑی ئسر۔ دیوان آن تران کرسا وزیر داخلہ پارے کہ ویزااپائنٹمنٹس کن سینٹرل ڈیجیٹل بینک و ویزہ غاتا جاری کننگ نا میکنزم آن پاکستان آ بروک آ غٹ درملکی تیا نظر تخنگ اٹی کمک رسینگک۔ داڑے دا ہیت قابل ذکر ءِ کہ وزیرداخلہ چوہدری نثارعلی خان نا پارت آ مسکوہی حکومت نا دور اٹی وزیراعظم آفس آن نوشتہ کرو ک آ چھٹی، ہراٹی اسلام آباد آن منظوری آن بیدس امریکہ ٹی پاکستانی سفیر ءِ ویزہ غاتا جاری کننگ نا اختیار تننگاسس، ءِ 2014ء ٹی پدی ہلنگاسس۔ وزیرداخلہ پارے کہ دا غٹ عمل ءِ پین شفاف جوڑ کننگ نا گرج ءِ۔ اوپارے کہ گدرینگوک آ مسہ سال اٹی داہیتءِ المی جوڑ کننگ کن اسہ ہم درملکی اس المی دستاویز آتیان بیدس پاکستان اٹ پترینگپ ، بھاز گڑا کننگانے۔ اوپارے کہ دا دستاویز آتیا ویزا ایشو کننگ کن المی تصدیق بایدے کننگے۔ اونادرا ءِ پارت کرے کہ ویزہ غاتا جاری کننگ کن آن لائن سسٹم اس جوڑ کننگے تانکہ ہر گڑا ریکارڈ آ برے۔ اوپارے کہ ہروڑنا بے قاعدگی کن ہچ ءُ جاگہ اس اف۔ دیوان اٹی 2017 ء آن پد وزارت داخلہ نا ایئر ونگ نا آخبتی نا بابت ہم خیال آتا درشانی کننگا۔ وزیر داخلہ چوہدری نثارعلی خان پارے کہ وزارت داخلہ نا ایئر ونگ پاک اوغان بارڈر خاص کر بلوچستان تون ملحقہ بھاز حساس علاقہ غاتیٹی دہشت گردی نا برخلاف جنگ، عسکریت ، انتہاپسندی و منشیات فروش آتا برخلاف کارروائی تے کن ءُ و دا ننا سیکورٹی فورس آتے کن بھاز کمکارمسنے۔ اووزارت ءِ پارت کرے کہ 2017 ء آن پد ہم ننا سیکورٹی ادارہ غاتے کمک فراوان کننگ کن ایئر ونگ نا تسلسل کن ڈٹ تیار کننگے۔ وزیر داخلہ نادرانا ماڑی تے کرایہ غا دوئی کننگ آہم پابندی عائد کرینے۔ اونادرا دفتر آتے کن کمرشل ریٹس آ جاگہ دوئی کپننگ نا ہم پارت کرینے۔ وزیر داخلہ نادراءِ پارت کرے کہ نادرا نا میگاسینٹرز آتون اوار مچ آ پاکستان اٹی تینا بنجاتا تزئین و آرائش کن پرائیویٹ کنٹریکٹر آتے تروک آ ریٹس آتیا نظرثانی کننگے۔ وزیر داخلہ نا پارت آ نادرا نا کنڈآن اڈتروک سافٹ ویئر کمپنی نیشنل ٹیکنالوجی لمیٹڈ ہم بند کننگا۔ وزیر داخلہ پارے کہ داکمپنی مالی بے ضابطگی تا ذریعہ ئس و مالی خوردبرد نا سوب دادے بند کننگا۔ اوپارے کہ داکمپنی نا بند مننگ نا باوجود نادرا نا جہانی کہول آتیا کروک آ وعدہ غاک زہمی مفسہ۔ نادرا نا جہانی زمواری و درملکی ادارہ و ملک آتون کروک آ وعدہ غاتے پورو کننگ کن المی گام گیج کننگے۔
