اینو پوسکن آ پاکستان جوڑ مننگ ءِ ، پاکستان نا حساب شون ہلوک ملک آتیٹی مریک، دہشت گرد آتا مخ انا ملی ءِ پرغان ، کراچی ٹی امن ایسونن، بلوچستان تون اوار مچ آ ملک شونداری نا کسرآروان ءِ
وزیراعظم محمد نواز شریف نا حیدرآباد اٹی ورکرز کنونشن آن تران
حیدرآباد۔ 27مارچ (اے پی پی) وزیراعظم محمدنواز شریف پارینے کہ اینو پوسکن آ پاکستان جوڑ مننگ ءِ، پاکستان نا حساب دنیا نا شون ہلوک ملک آتیٹی مریک، ملک اٹی دہشت گرد آتا مخ انا ملی ءِ پرغانن، کراچی ٹی امن ایسونن، بلوچستان تون اوار مچ آ ملک شونداری نا کسر آ روان ءِ، کراچی آن لاہور اسکان موٹروے جوڑ مننگ ءِ، سندھ انا الس آن وونٹ خوائنگ کن بروک آتیان بایدے ہریفنگے کہ اوفک ملک اکن انت کریر؟ وزیراعظم حیدرآباد اٹی یونیورسٹی و جہانی بالی پٹ انا جوڑ جاڑ آن بیدس 50 کروڑ روپئی نا شونداری فنڈ، بجلی و گیس انا فراوانی نا اسکیم وہیلتھ کارڈ اسکیم ناجاری کننگ نا ہم پڑو کرے۔ دوشنبے نا دے داڑے ورکرز کنونشن آن تران کرسا وزیراعظم محمد نواز شریف کنونشن اٹی شریک کارندہ غاتا جوش و جوزہ نا ستاءِ کرساپارے کہ اوڑتون دا جوش و جوزہ نا ستا ء کن ہچ ءُ لوز اس اف ۔ اوپارے کہ ای کارندہ غاتے است انا ھب اٹ سلام پیش کیوہ۔ وزیراعظم پارے کہ داسہ ہراتم او کنونشن اٹی ساڑی مننگ کن داڑے بسورہ تو کسر اٹی بھاز انگا ورناو ننا ایڑک پدی ہنارہ و داڑے بھاز رش ئس و بھاز انگا بندغ آک مچ ئسر، ہرانا سوب او خلقت مجبوراََ پدی ہنارہ و کنے بھاز افسوز بسکہ کہ او جاگہ مفننگ نا سوب آن پدی ہنار و اوغٹ آن بشخنداری خواوہ ، ای ولدا حیدرآباد آ بریوہ و او غٹ اتون ملیوہ و اوفتے تون است انا ہیت آتے کیوہ ولے اینو پروگرام نا رداٹ طے ئس کہ اینو نن داڑے کنونشن نا دروشم اٹی نم تون ہیت کیو۔ او پارے کہ دا جوش و جوزہ بدلی نا پیشہ خیمہ نظر بننگ ءِ و داجوش و جوزہ ہرادے اینو ای حیدرآباد اٹی خننگ اٹی اُٹ دا دے ٹھٹھہ ٹی ہم خنانٹ، دا بلوچستان ، پنجاب و کے پی کے ٹی ہم خنانٹ۔ اوپارے کہ مثالی جوش وجوزہ غا ای حیدرآباد نا الس ءِ مبارکبادی ایتیوہ۔ وزیراعظم کنونشن نا شرکاء ءِ مخاطب کرسا پارے کہ پاکستان بدل مننگ ءِ ، اللہ نا فضل و کرم اٹ پوسکن آ پاکستان جوڑ مننگ ءِ، نم خننگ اٹی اورے کہ پاکستان نا تہٹی 2013ء اسکان تنکی ئس، ہر کنڈآ بے چینی ئس، اضطراب ئس و جاگہ اس ہم سکون ملیتوکہ، 2013ء آن پد نن مخ ءِ تفین کہ ننے پاکستان نا ویل آتے چٹفوئی ءِ، دہشت گردی ہرا پاکستان نا تہٹی تینا گام ءِ تخاسس توسوسس اللہ نا فضل وکرم اٹ اونا مخ ءِ پرغانن، کراچی دہشت گردی نا گواچی ئس ، اینو ہموڑے امن و سکون ءِ۔ اینو کراچی ٹی کاروبار مننگ ءِ ، مزور مزوری کننگ ءِ، اینو اُراتیٹی اضطراب اف ، خلقت خلیپک و حیدرآباد ہم ہرا کراچی نا ہمسایہ شار ءِ ، ہموڑے ہم دہشت گردی ءِ چٹفینن۔ مچ آ پاکستان نا تہٹی دہشت گردی ءِ چٹفینن و اینو ہبو کہ دہشت گردی مون مون اٹ نرنگ ءِ و نن اونا مخ ءِ پرغانن۔ وزیراعظم پارے کہ ننا عزم بھاز پکا ءِ و نن انشاء اللہ دہشت گردی ءِ چٹفنگ آن بیدس دم ہلپنہ بلکن دہشت گرد آتے چٹفسا دم ہلینہ۔ اوپارے کہ ای بلوچستان آ ہناٹ ہموڑے ہم دہشت گردی نا راج ئس ، اینو ہموڑے ہم امن ءِ و اینو بلوچستان ہم شونداری نا کسرآروان ءِ ، ہموڑے بھاز ترندی اٹ شونداری مننگ ءِ۔ اوپارے کہ سی پیک نا فائدہ مچ آ ملک ءِ رسینگ انگ ءِ ۔ ہمووخت مر اف کہ انشاء اللہ پاکستان آن پورو وڑاٹ بے روزگاری ، نیزگاری و جہالت چٹک، تعلیم و درمان نا آسراتیک لس مریرہ ، جاگہ جاگہ کالج و یونیورسٹی جوڑ مریک۔ داٹی حیدرآباد نا پن ہم بننگ والا ءِ ، حیدرآباد ہم پاکستان نا ہمو فہرست اٹی اوار مریک ہراڑے گچین ءُ ادارہ و ہسپتال جوڑ مریک، انڈسٹری لگک و اکنامک زون جوڑ مریک۔ اوپارے کہ اینو موٹروے جوڑ مننگ ءِ۔ او شریک مروک آتون استفسار کرے کہ دا موٹروے مہالو انت اکن جوڑ متو؟ داڑے مشرف نا حکومت ئس، ولدا 2008 ء آن ہلیس 2013ء اسکان پیپلزپارٹی نا حکومت ئس ، دازمانہ ٹی حیدرآباد اٹی موٹروے و حیدرآباد اٹی یونیورسٹی انت اکن جوڑ متو؟ دا زمانہ ٹی ہیلتھ کارڈ انت اکن تننگ تو؟ وزیراعظم پارے کہ کنے پاننگانے کہ داڑے روڈآک پنوک ءُ ، کُننگ کن صاف ءُ دیر اف، اسکول اف، ہسپتال اف۔ اوپارے کہ داحالیت آتا بنگٹ کنا بھاز است ہسون مس ، ہراتم ای کراچی آ کاوہ تو خنیوہ کہ جاگہ جاگہ کچرہ تا ڈھیر لگوک ءِ ، ای ہم کراچی ٹی اسہ زمانہ اسے ٹی چار تُو رہینگاسٹ و ہموڑے خواناٹہ، کراچی ٹی، ای کورس کریٹ، وہمووخت انا کراچی و اینو نا کراچی ءِ ہریوہ تو زمین و آسمان نا پرخ نظر بریک، او کراچی بھاز پرسکون و صاف ستھراءُ شار اس ئس ، دنیا کراچی آ بسکہ، مڈل ایسٹ والاک کراچی آ بسورہ ، ولے ولدا انت سوب مس کہ کراچی انت کن کٹائنگا۔ اوپارے کہ کراچی پاکستان نا شہ رگ ءِ ، کراچی شونداری کیک تو مچ آ پاکستان شونداری کیک ۔ ہراتم ای وزیراعظم ئسٹ تو نن 1991 ء ٹی موٹروے نا ڈٹ انا بناءِ کرین ، پشاور آن اسلام آباد و اسلام آباد آن لاہور اسکان نا ڈٹ جوڑ کننگا۔ کنا است اٹی ئس انشاء الل دا ڈٹ ملتان ، سکھر، حیدرآباد و ولدا کراچی اسکان کائک۔ دا کنا تغ ئس ولے ہندن کہ موٹروے لاہور آ سرمس تو ننا حکومت ہنا و اوکان پد 1999 ء آن ہلیس داسہ ننا حکومت بننگ اسکان اسہ انچ اس ہم موٹروے لاہور آن مون آ ہنتو، اسٹ اس ہم دابارواٹی سجفتو۔ وزیراعظم سوج کرے کہ گدرینگوک آ 16، 17 سال آن دا ملک اٹی ہراک حکمران مسنو اوفک دابارواٹی انت اکن سجفتوس؟ اوپارے کہ سجفنگ تو مر انا ہیت اسے اوفک پاکستان ءِ تہاری تیٹی بٹیر۔ ہنداخہ زبردست لوڈشیڈنگ مس کہ نئے تو مزور آرام اٹ خاچنگ کریکہ و نئے لس بندغ،نئے کشارگر تینا ٹیوب ویل آتے چلیفنگ کریکہ و نئے کاروبار مننگ کریکہ۔ اوپارے کہ موٹروے پاکستان نا اسہ گچین ءُ روڈ اسے۔ اوپارے کہ موٹروے ماشاء اللہ اسہ گچین ءُ روڈا س جوڑ مننگ ءِ و ہند اموٹروے داسہ حیدرآباد آن سکھرآ کائک، دا شش رویہ روڈ مریک، موٹروے ملتان آ سرمریک و ملتان آن لاہور اسکان کائک۔ اوپارے کہ داسہ کراچی و حیدرآباد نا رہینگوک آ چناتتون سہب انا ناشتہ کرسا لاہور کن رادہ مریک و پیشیم نا چاہ ءِ لاہور اٹی کُنیک اوکان پد او شام انا اِرغ ءِ اسلام آباد اٹی تولک کُنیک و خفتن نا نماز ءِ پشاور اٹی خوانک، ہنداوڑ سہب آن شم اسکان او کراچی و حیدرآباد آن پشاور اسکان نا سفر ءِ کننگ کیرہ۔اوپارے کہ حیدرآباد نا میئر و ڈپٹی میئر داڑے تولوک ءُ ، حیدرآباد کن 50 کروڑ روپئی نا شونداری فنڈ تننگ نا پڑو ءِ کیوہ۔ وزیراعظم حیدرآباد کن یونیورسٹی نا پڑو ءِ ہم کرے وپارے کہ او حیدرآباد نا چناتے دا خوش خبری ءِ بنفنگ ءِ کہ انشاء اللہ حیدرآباد اٹی بھاز زوت یونیورسٹی نا بنداو ءِ تخنگک۔ اوپارے کہ یونیورسٹی کن وسیم حسین و راحیلہ مگسی خواست کریسر ہنداخاطران ای دا یونیورسٹی کن دمدستی وڑاٹ 100 کروڑ تننگ نا پڑو ءِ کننگ اٹی اُٹ۔ اوحیدرآباد نا نواحی علاقہ غاتے کن سوئی گیس و بجلی نا فراوانی نا ہم پڑو ءِ کرے۔ داکان مست بنجائی وزیر ریلوے خواجہ سعد رفیق ، سینیٹر راحیلہ مگسی و ایلوفک ہم کنونشن آن تران کریر۔ داوخت آ گورنر سندھ محمد زبیر ہم ساڑی ئس۔
