اسلام آباد۔ 27مارچ (اے پی پی) کوئٹہ تون اوار بلوچستان نا غٹ جیل آتیٹی بندی و کولاکانڑ آتیٹی ایڈز انا اسکریننگ نا کاریم جاری ئِ۔ نجی ٹی وی چینل بلوچستان صوبائی ایڈز پروگرام نا بابت خبر ترسا پارینے کہ گدرینگوک آ اِرا سال اٹی کوئٹہ و تربت اٹی ایڈز انا مریض آتا کچ 710 اسکان سرمسنے و مریض آتیٹی ترندی اٹ ودکی نوٹ کننگ انگ ئِ، حساب وکتاب نا رداٹ کوئٹہ ٹی 352نرینہ، 84زالبول و 25چنا، تربت ٹی 213 نرینہ و 25زالبول و 9 چناتیٹی ایڈز انا تشخیص مسنے ۔ دا چرجوئی ٹی صوبائی وزیر جان جوڑی میر رحمت صالح بلوچ نا پاننگ ئِ کہ بلوچستان نا 24ضلع غاتیٹی الس ئِ ایڈز انا تشخیص نا آسراتی فراوان کننگانے، کوئٹہ و تربت اٹی 444 مریض آتے مفت درمان نا آسراتی ہم تننگانے۔ او پارے کہ کوئٹہ تون اوار بلوچستان نا غٹ جیل آتیٹی بندی و کولا کانڑ آتیٹی ایڈز انا اسکریننگ نا کاریم جاری ئِ و بھلو کچ اسے ٹی پوسکن آ ایڈز انا مریض مون آ بسنو ہرافتے مفت درمان نا آسراتی نا فراوانی ئِ المی جوڑ کننگ انگ ئِ۔ اومستی پارے کہ محکمہ جان جوڑی فاطمہ جناح چیسٹ ہسپتال اٹی سی ڈی 4 و وائرل لوڈمشین ہم نصب کننگانے۔
