سی پیک آن پاکستان بھلو واپاری و اقتصادی بنجااس جوڑ مریک، چین و روس اکن ہم واپاری راہداری اسے
اسلام آباد۔ 27مارچ (اے پی پی) قومی سلامتی نا سلاہکار لیفٹیننٹ جنرل (ر) ناصر خان جنجوعہ پارینے کہ بھارت ڈیہہ نا اِراایٹمی واک آتون محاذ اس ملانے ، اوغانستان تون ہر دروشم اٹی تعلقداری تے گچین جوڑ کروئی مریک، جنرل راحیل شریف سعودی سیکورٹی سیوت نا سروک جوڑ مس تو دا امت مسلمہ نا سیوت نا سوب مریک۔ دوشنبے نا دے داڑے ہندی ہوٹل اٹی غیر سرکاری تنظیم نا کنڈآن بحر ہند اٹی میری تائمز سیکورٹی چیلنج آتا سرحال آن اڈ ہلوک سیمینار آن تران کرسا اوپارے کہ نائن الیون آن پد دہشت گردی ٹی میری ٹائمز سیکورٹی چیلنج آتے بے حد اہمیت تسنے۔ سلاہکار قومی سلامتی پارینے کہ پاکستان بھلو وخت اسے آن دہشت گردی نا مقابلہ ئِ کننگ ئِ ، گدرینگوک آ 38 سال آن پاکستان و اوغانستان سیکورٹی نا چیلنج آتون مون تننگ ئِ۔ اوپارے کہ اوغانستان تون ہر دروشم تعلقداری تے گچین جوڑ کروئی مریک۔ اوپارے کہ بھارت اِرا ایٹمی واک آتا برخلاف محاذ اس ملانے۔ بحری قزاقی دا تصور ئِ پوسکن ئُ جہت اس تس و دادے اولیت آتیٹی اوار کننگا۔ سلاہکار قومی سلامتی نا پاننگ ئس کہ ننے تینا پالیسی ئِ سمندری سیکورٹی نا چیلنج آتا غٹ جہت آتے ذہن اٹی تخسا مرتب کروئی ئِ ۔ پاک بحریہ ڈیہہ ٹی بے کچ باصلاحیت بحریہ ئِ ۔ نن تقابل آن بیدس کمک نا فضا ئِ اولیت ایتنہ۔ اوپارے کہ پاکستان نا محل و وقوع اودے ڈیہہ نا گیٹ وے جوڑ کیک۔ بحر ہند نا ہچ ئُ دنگ اس اف، دا دنیا نا دریاو سمندر آتون گنڈوک ئِ۔ اومستی پارے کہ نن اسہ بھلو واپاری راہداری سے نا حیثیت اختیار کرینن، چین و روس اکن ہم نن داسہ اسہ واپاری راہداری اسے۔ سی پیک جوڑ مننگ آن پاکستان اسہ بھلو واپاری و اقتصادی بنجااس جوڑ مریک۔
