کوئٹہ۔ 17جون (اے پی پی) پاکستان تحریک انصاف نا صوبائی راہشون حمزہ خان ناصر پارینے کہ ملک شونداری و شونہالی و الس نا شونہالی کن حکومتی و اپوزیشن جماعت آتے تینا سیاسی و جندی اختلاف آتے اسہ کنڈ تخسا تینا کڑد ءِ ادا کروئی مریک، ملک انا شونداری و شونہالی کن پاک فوج و حکومت نا اسہ پنہ غا مننگ جوان ءُ گام اسے۔ داخیال آتا درشانی ءِ او پنچ شنبے نادے آ ”اے پی پی“ تون خصوصی گپ وتران کرسا کرے۔ اوپارے کہ پاکستان ننا باوہ و پیرہ نا بھاز انگا جانی و مالی قربانی تیان پد دوئی مس ولے 74سال گدرینگ انگ آن پد ہم ملک شونداری نا کنڈآ ہِننگ کتو۔ اوپارے کہ سیاسی جماعت آک اقتدار اٹ برسا بیرہ تینا فائدہ غاتے دوئی کریر ولے اوفک الس نا ہچ ءُ خذمت اس کتور داسہ وخت بسنے کہ سیاسی جماعت آک تینا سیاسی و جندانا اختلاف آتے اسہ کنڈتخسا ملک و صوبہ نا شونداری و شونہالی کن تینا کڑد ءِ ادا کیر۔ اوپارے کہ اختلاف رائے جمہوریت نا زیبائی ءِ ولے سیاسی جماعت آتے مرے کہ او اسہ ایلو نا مثبت کاریم تا ستاءِ کیر و ردینک آتا پیدواری ءِ کیر۔ اوپارے کہ اینو ملک انا شونداری و شونہالی والس نا شونہالی کن حکومت و پاک فوج اسہ پنہ غاٹو ہرااسہ جوان ءُ گام اسے داسہ دا سیاسی جماعت آتا ہم زمواری ءِ کہ او الس نا خذمت ءِ تیناکیر۔ اوپارے کہ بلوچستان نا شونداری پاکستان نا شونداری ءِ داسہ ننے اواری اٹ پاکستان نا پن ءِ مچ آ دنیاٹی روشناکروئی ءِ گوادر سی پیک نا پوروی آن ملک اٹی شونداری نا پوسکن ءُ کسر ملنگک و الس ءِ روزگار نا وارخواہی دوبریک۔
