اسلام آباد۔ 11جون (اے پی پی) وزیرخارجہ مخدوم شاہ محمود قریشی پارینے کہ بجٹ 2021-22آن پیدوار مس کہ نن زرگزران ءِ سوگو کرینن، داسہ نن اقتصادی بابت گروتھ نا کنڈآکانہ۔ جمعہ نادے آ بجٹ 2021-22نا بابت پارلیمنٹ نا راہداری ٹی گپ وتران کرسا وزیر خارجہ پارے کہ دابجٹ آن پاش ءِ کہ نن زرگزران ءِ سوگو کرینن و داسہ ننے گروتھ نا کنڈآ ہنوئی ءِ، دابجٹ اٹ آسودہی و رعایت تننگانے۔ اوپارے کہ نیامی تپہ نا ہم خاص خیال ءِ تخنگانے و نیزگار تپہ کن بھاز انگا پوسکن آ اسکیم تا پڑو ءِ کننگانے۔ مخلوق ءِ تینا اُرانا مالک جوڑ کننگ کن پالیسی اس مرتب کننگانے و زر جتا کننگانے، دابجٹ اٹ بزغرآتے کن بھاز انگا آسودہیک ءُ ہرافتے ٹی بے سود وام تا فراوانی اوار ءِ تانکہ کشت وکشار نا بشخ پین شون ہلے۔ وزیرخارجہ پارے کہ ہاؤسنگ نا بشخ آ خاص چکارکننگانے و کوشست کننگانے کہ دا”ایکسپورٹ لیڈ گروتھ بجٹ“ مرے وخت اس کہ ملازم آتا تنخواہ و پنشنر آتے ٹی ہم ودکی کننگانے۔ اوپارے کہ دابجٹ اٹ نم ہریرے کہ نن اقتصادی بابت گروتھ نا کنڈآ کانہ۔
