اسلام آباد۔ 11جون (اے پی پی) بروک آ مالی سال 2021-22ء نا 8487ارب روپئی نا بنجائی بجٹ ءِ قومی اسمبلی ٹی پیش کننگا، سرکاری ملازم آتا تنخواہ و پنشنر آتا پنشن اٹی 10 درسد ایڈہاک ریلیف تننگانے، سرکاری بشخ انا شونداری بجٹ نا کچ 900 ارب روپئی ءِ، کم آن کم اجرت 20 ہزار روپئی ماہانہ تخنگ نا سلاہ ءِ، گراس محصولات آتا کچ 7909ارب روپئی تخنگ نا سلاہ ءِ ہرا تدوک آ سال انا نظرثانی مروک 6395ارب روپئی نا مقابلہ ٹی 24 درسدزیات ءِ، نان خراج ریونیو ٹی 22 درسد ودکی کننگانے، جم سبسڈیز آتا کساس 682ارب روپئی خلنگانے، احساس پروگرام کن 260 ارب روپئی جتا کننگانے، شرح نمو نا ہدف 4.8 درسد تخنگانے، ہندی وڑاٹ جوڑ کروک آ 850 سی سی اسکان کارتیا فیڈرل ایکسائز ڈیوٹی ٹی چھوٹ و سیلز خراج 17 درسد آن کم کرسا 12.5 درسد کننگ انگ ءِ وخت اس کہ داڑآ ویلیو ایڈڈ خراج نا چٹفنگ نا سلاہ ءِ۔ جمعہ نادے آ قومی اسمبلی ٹی بروک آ مالی سال 2021-22ئئ نا بجٹ ءِ پیش کرسا وزیرخزانہ شوکت ترین پارے کہ عمران خان ہراتم حکومت ءِ سنبھالا تو اودے شکستہ زرگزران میرات اٹ ملا، اسہ کنڈآ ننے وام تا سوب آن خواتہ مننگ نا حالیت آتا مون تروک ئس و ایلو کنڈآ درآمد نا خواست ءِ پورو کننگ کن زر دوئی الوکہ۔ مسلم لیگ (ن) نا تدوک آ حکومت نا کنڈآن بیدس سجفنگ آن وام ہلنگ نا سوب آن داحالیت ودی مس۔ تدوک آ حکومت نا کنڈآن نشان تروک آ زرگزرانی نمائشی شونداری زیات شرح سود آ ملکی و پیشن نا ذریعہ اٹ بھاز زیات وام ہلنگ نا سوب آن ئس و وام ہلنگ نا زمواری ننا زی آ بس۔مستین اٹ شاید پوسکن ءُ حکومت اسے داوڑنا مشکل حالیت آتون مون تروک مروئے۔ اوپارے کہ ہراوخت آ نن حکومت ءِ سنبھالان ہمووخت آ کرنٹ اکاؤنٹ نسخان 20 ارب ڈالر نا تاریخی بڑزانگا کہول آ ئس۔ درآمد کم وود 56 ارب ڈالر اٹ و برآمدآک 25 ارب ڈالر ئسر۔ اوپارے کہ اہم فصل آتا پیدوار اٹی تاریخی ودکی آن بزغرآتے 3100ارب روپئی نا آمدنی مس وخت اس کہ تدوک آ سال داکٹیا 2300ارب روپئی ئس۔ وزیرخزانہ پارے کہ احساس پروگرام نا رداٹ 40 درسد آن زیات مخلوق ءِ نغد امداد تننگا، کوویڈ۔ 19آن پد ہم تدوک آ اسہ سال اٹی فی کس کٹیاٹی اوسطاََ 15 درسد ودکی مسنے۔ اوپارے کہ ملک اٹی خراج وصولی 4ہزار ارب روپئی نا نفسیاتی حد ءِ سرتسنے۔ ریفنڈ نا ادائیگی تدوک آ سال انا نسبت 75 درسد زیات ءِ۔ خراج گوشوارہ جمع کرفوک آتے ٹی مسہ لکھ دُوانزدہ ہزار نا ودکی کرینن ہرافک 51 ارب روپئی نا خراج ریٹرن اداکرینو۔ اوپارے کہ داسال برآمدآتے ٹی 14 درسد ودکی مسنے۔ اوپارے کہ ترسیلات زر اٹی 25 درسد ریکارڈ ودکی نا سوب آن دا کوڑی 29 ارب ڈالر اسکان سرمننگ نا خڑک ءِ ہرا سمندرپار پاکستانی تا وزیراعظم عمران خان نا کماشی آ پت انا درشانی ءِ۔ سرکاری زرمبادلہ نا کوڑی 16 ارب ڈالر ءِ ہرا3تُو آن زیات نا درآمدی بل اکن بس ءُ۔ تدوک آ سال انا مقابلہ ٹی روپئی نا قدر اٹی بھاز نمان ودکی مسنے۔ اوپارے کہ تدوک آ اسہ سال اٹی خام تیل انا نہاد آتے ٹی دنیا ٹی 180 درسد ودکی مس وخت اس کہ ملکی کہول آ اوفتا نہادآک بیرہ 45 درسد ودار۔ اوپارے کہ سرکاری وام تے ٹی داسہ کمتی بننگ بناکرینے۔ بروک آ مسہ سال اٹی خراج نا نظام اٹ شفافیت و گچینی اتنگ نا سوب آن سرکاری وام تے ٹی پین کمتی بریک و اودے پائیدار کہول آ اتنگ اٹ کمک رسینگک۔ اوپارے کہ دا پڑو ءِ کرسا اودے خوشی ءِ کہ داسہ زرگزران نا سوگوی نا ریسہ بھلو حداسسکان پورو مسنے۔ بجٹ 2021-22ء ٹی جامع وپائیدار نمو نا دوئی کننگ ننا وت مریک۔ بروک آ سال اکن نن زرگزرانی شونداری نا ہدف ءِ 4.8درسد تخانن۔ اوپارے کہ سرسہب پاکستان پروگرام نا رداٹ کم کٹیا ہاؤسنگ نا مد اٹی 20 لکھ روپئی اسکان اڑزآن وام تننگک۔ ہراُراءِ جان جوڑ کارڈ تننگک۔ ہراُرانا ہر بندغ ءِ مفت تکنیکی تربیت تننگک۔ ہرکشارگر اُراءِ دسنگ کن ہرفصل اکن یک ونیم لکھ روپئی نا سود آن پاک وام ایتنہ و ٹیکٹر و مشینی ازباب آتے کن اِرالکھ روپئی وام تننگک۔ ہرشاری اُراءِ کاروبار کن پنچ لکھ روپئی اسکان سود آن پاک وام ایتنہ۔ اوپارے کہ ننا آبادی نا 65 درسد بشخ 30سال آن کم وئی بندغ آتیا تالان ءِ۔ بروک آ اِراسال اٹی مسہ سال آتے ٹی کم آن کم 6 آن 7 درسد نمو ءِ پک کننگ خوانہ ہراڑآن ورناتے روزگار ملک و او شونہال زند اس تیر کننگ کیرہ۔ دامسخت کن صنعت، برآمدات، ہاؤسنگ و تعمیرات نزور تپہ غاتے کن راجی رکھ انا پروگرام و توانائی نا بشخ اٹی اصلاحات آ خاص چکار کننگ انگ ءِ۔ کشت وکشار نا بشخ اٹی جامع ڈٹ ترتیب تننگانے ہرانا رداٹ بج، کھد، کشاری وام، ٹیکٹر و مشینری،م کولڈ ویئر ہاؤس آتا تفنگ و فوڈ پراسیسنگ انڈسٹری ٹی کمک کننگک۔ وزیر خزانہ پارے کہ بروک آ مالی سال انا بجٹ اٹی احساس پروگرام کن 260 ارب روپئی سلاہ کننگانے۔ صنعت و برآمد آتے کن خصوصی کوشست کننگک۔ کم کٹیااُراتے تینااُرا اس ہلنگ یا جوڑ کننگ اٹ کمک کن مسہ لکھ روپئی سبسڈی تننگ انگ ءِ دامسخت کن بروک آ مالی سال انا بجٹ اٹی 33 ارب روپئی تخنگانے۔ وزیرخزانہ شوکت ترین پارے کہ چندی سروسز آتیا کٹیائی نا مارجن کم ءِ و عائد ودہولڈنگ شرح بھاز زیات ءِ ہراڑآن اوفتے ویل آتا مون تروک تمک۔ سلاہ ءِ کہ آئل فیلڈ سروسز، ویئرہاؤسنگ سروسز، کولیکٹرل مینجمنٹ سروسز، سیکورٹی سروسز و ٹریول اینڈ ٹور سروسز آ ودہولڈنگ خراج شرح ءِ ہشت درسدآن کم کرسا مسہ درسد اسکان کننگے۔ شوکت ترین پارے کہ موبائل سروسز آ ساڑی ودہولڈنگ خراج شرح 12.5درسد ءِ، لس شاری آ بھاریم ءِ کم کننگ کن سلاہ ءِ کہ بروک آ مالی سال اکن داکچ ءِ کم کرسا 10 درسد کننگے۔ سلاہ ءِ کہ دادے پدریسہ 8 درسد اسکان کم کننگے۔ وزیر خزانہ شوکت ترین پڑوکرے کہ زرگزرانی حالیت آتے ٹی گچینی بسنے و نن محسوس کینہ کہ نہاد آتے ٹی ودکی نا سوب آن مخلوق نا ہلنگ نا وس ہم زہمی مسنے ہنداخاطرآن سرکاری ملازم و پنشنر آتے کن گام گیج آتا پڑو کننگک ہرانا رداٹ یکم جولائی 2021ء آن غٹ بنجائی سرکاری ملازم آتے دہ درسد ایڈہاک ریلیف الاؤنس تننگک۔ یکم جولائی آن پنشن اٹ دہ درسد ودکی کننگک۔ اردلی الاؤنس 14ہزار روپئی ماہانہ غان ودفسا 17500کننگک۔ گریڈ اسٹ آن پنچ اسکان نا ملازم آتا انٹیگریٹڈ الاؤنس 450 روپئی آن ودفسا 900 روپئی کننگ نا سلاہ ءِ۔ وزیر خزانہ شوکت ترین پڑو کرے کہ کم کٹیا بندغ آتیا کبینی نا زور ءِ کم کننگ کن کم آن کم اجرت 20ہزار روپئی ماہانہ کننگ انگ ءِ۔
