بجٹ اٹ اہم اخراجاتی اولیت، کورونا ویکسینیشن، ہیلتھ کوریج، سرسہب پاکستان پروگرام، اینٹی ریپ فنڈ، بڑزکو تعلیم، درآمدی کمکاری فنڈ، خصوصی علاقہ غاتے کن امداد، پوسکن آ مردم شماری، لوکل گورنمنٹ الیکشن و کوویڈ ایمرجنسی فنڈ اوار

اسلام آباد۔ 11جون (اے پی پی) بروک آ مالی سال 2021-22ء ٹی بنجائی حکومت نا اہم اخراجاتی اولیت آتے ٹی کورونا دین آن بچنگ کن ویکسینیشن، یونیورسل ہیلتھ کوریج، چنکا و نیامی کچ انا کاروبار نا کمکاری پروگرام، سرسہب پاکستان پروگرام، اینٹی ریپ فنڈ، بڑزکو تعلیم، درآمدی کمکاری فنڈ، سرکاری ادارہ غاتے کن امداد، خصوصی علاقہ غاتے کن امداد، پوسکن آ مردم شماری، لوکل گورنمنٹ الیکشن و کوویڈ ایمرجنسی فنڈ اوار ءُ۔ بنجائی وزیر خزانہ ومحصولات شوکت ترین جمعہ نادے آ قومی اسمبلی ٹی بروک آ مالی سال انا بجٹ ءِ پیش کرسا پارے کہ الس ءِ کوویڈ آن رکھ تخنگ کن کم و ود1.1ارب ڈالر ویکسین نا درآمد آ خڑچ کننگک۔ بنائی ہدف جون 2022ء اسکان 10 کروڑ مخلوق ءِ ویکسین خلنگ نا ءِ۔ اوپارے کہ وزیراعظم نا یونیورسل ہیلتھ کوریج اسکیم اٹ صوبہ غاتا کمک اٹ پین وسعت اتنگک۔ ایس ایم ایز سپورٹ پروگرام ءِ کاروباراٹ خطرات شیئر کننگ و بلاضمانت وام تا فراوانی کن بھاز انگا اسکیم تیا سلاہ کننگانے ہرافتے کن 12 ارب روپئی جتا کننگانے۔ سرسہب پاکستان پروگرام کن بجٹ اٹ 10 ارب روپئی تخنگانے۔ اوپارے کہ وزیراعظم نا کنڈآن خصوصی پارت آتیا اینٹی ریپ فنڈ اس جوڑ کننگ انگ ء، ہراڑکن بنائی وڑاٹ 100 ملین روپئی نا زر تخنگانے۔ ہراٹی اوکان پد ودکی کننگک۔ بڑزکو تعلیم کن ہندا بجٹ اٹی ایچ ای سی ءِ 66 ارب روپئی نا زر تننگ نا سلاہ ءِ و شونداری بجٹ کن اودے 44 ارب روپئی فراوان کننگک۔ اوکان پد داٹی 15 ارب روپئی نا ودکی کننگک۔ درآمدی بشخ اکن کمکاری فنڈ ءِ چندی اسکیم تا رداٹ کمکاری نا عمل برجاسلک۔ سرکاری ادارہ غاتا امداد کن پی آئی اے و سٹیل مل آتا نسخان اٹ گچین مینجمنٹ نا کمک اٹ کمتی اتنگانے۔ ولے اوفتے داسہ ہم بنجائی حکومت نا کنڈآن مالی امداد درکار ءِ۔ پی آئی اے کن 20 ارب و سٹیل مل آتے کن 16 ارب روپئی بجٹ اٹ تخنگانے۔ خصوصی علاقہ غاتے کن امداد نا چرجوئی ٹی آزاد جموں و کشمیر کن بجٹ اٹی زر 54 ارب روپئی آن ودفسا 60 ارب روپئی کننگانے۔ گلگت بلتستان کن بجٹ 32 ارب روپئی آن ودفسا 47 ارب روپئی کننگ نا سلاہ ءِ۔ سندھ ءِ 19 ارب روپئی نا خصوصی گرانٹ و بلوچستان ءِ اونا این ایف سی بشخ آن بیدس پین 10 ارب روپئی فراوان کننگک۔ 2022ء ٹی پوسکن آ مردم شماری کرفنگ کن 5 ارب روپئی نا زر بنجائی بشخ انا وڑاٹ سلاہ کننگانے۔ ہندی حکومت آتا گچین کاری کن 5 ارب روپئی نا زر تخنگانے۔ وخت ا س کہ کوویڈ ایمرجنسی فنڈ آن تعلقدار امور کن 100 ارب روپئی سلاہ کننگ انگ ءِ۔