اسلام آباد۔ 11جون (اے پی پی) بروک آ مالی سال 2021-22نا جم قومی شونداری بجٹ اٹی اینخو مالی سال 2020-21نا مقابلہ ٹی 535000ملین روپئی ودکی کننگانے۔جمعہ نادے آ داڑے پیش کروک آ سرکاری بشخ انا شونداری پروگرام (پی ایس ڈی پی) نا حساب وکتاب نا رداٹ بروک آ مالی سال اکن پاکستان نا جم شونداری بجٹ کن 2135000ہزار ملین روپئی جتا کننگانے وخت اس کہ برجامالی سال اکن ملک انا جم شونداری بجٹ کن 1600000ملین روپئی جتا کننگاسس۔ ہنداوڑ اینخو مالی سال انا مقابلہ ٹی بروک آ مالی سال 2021-22کن ملک انا جم شونداری بجٹ اٹی 53500ملین روپئی ودکی کننگانے۔ پی ایس ڈی پی نا رداٹ جم قومی شونداری بجٹ اٹی بروک آ مالی سال اکن بنجائی شونداری بجٹ نا بشخ 900000ملین روپئی ءِ وخت اس کہ صوبہ غاتا شونداری بجٹ نا رداٹ 1235000ملین روپئی جتا کننگانے۔ یات سلے کہ اینخو مالی سال انا جم قومی شونداری بجٹ اٹی جم قومی شونداری بجٹ نا رداٹ 16لکھ ملین روپئی جتا کننگاسس ہرافتے ٹی بنجا نا شونداری بجٹ نا بشخ 650000ملین روپئی وخت اس کہ صوبہ غاتا شونداری بجٹ نا رداٹ 950000ملین روپئی جتا کننگانے۔ رپورٹ نا رداٹ برجامالی سال اٹی درملکی امداد نا مد اٹی جم وڑاٹ 322475.325ملین روپئی وخت اس کہ حکومت نا تینا وسیلہ غاتا رداٹ 1277524.675ملین روپئی جتا کننگاسس۔ بروک آ مالی سال 2021-22ء ٹی پاکستان نا جم شونداری بجٹ اٹی درملکی امداد نامد اٹی 2902000ملین روپئی نا بجٹ جتا کننگانے وخت اس کہ بنجائی وصوبائی حکومت آک تینا وسیلہ غاتیان مچ آ ملک اٹی چندی شونداری ڈٹ آتا پوروی کن 1843000ملین روپئی نا فنڈ فراوان کیرہ۔ بروک آ مالی سال انا جم قومی شونداری پروگرام کن درملکی امداد نا مد اٹی جتا کروک بجٹ اٹی اینخو مالی سال انا مقابلہ ٹی 30475.325ملین روپئی نا کمتی مسنے۔ ایلو کنڈآ بنجائی و صوبائی حکومت آتا کنڈآن شونداری ڈٹ آتا پوروی کن تینا وسیلہ غاتیان فنڈ آتا فراوانی نا بابت اینخو مالی سال انا مقابلہ ٹی بروک آ مالی سال کن جتا بجٹ اٹی 565475.325ملین روپئی نا ودکی کننگانے۔
