اسلام آباد۔ 11جون (اے پی پی) وزیرخارجہ مخدوم شاہ محمود قریشی تون گورنر پنجاب چوہدری محمد سرور جمعہ نادے آ اسلام آباد اٹی اوڑدہی کرے۔ اوڑدہی ٹی فلسطین امن سفارتی مشن، اسلاموفوبیا نا ودوک آ رجحان تون اوار تین پہ تینی است خواہی نا باندات آ گپ وتران کننگا۔ گورنر پنجاب مظلوم فلسطینی تیا برجامنظم ظلم انا کنڈآ جہانی برادری نا چکار ءِ کرفنگ و فلسطین امن سفارتی مشن نا سرسہبی آ وزیرخارجہ ءِ مبارکبادی تس۔ ہڑتوم آ راہشونک کینیڈاٹی رہینگوک آ پاکستانی نژاد خاہوت نا بے قصور بندغ آتا خون آ ڈکھ و است ہسونی نا درشانی ءِ کریر۔ وزیرخارجہ پارے کہ بے گناہ کہوک آتے انصاف ترفنگ کن و اسلاموفوبیا نا ودوک آ رجحان نا توننگ کن کنا کینیڈا نا وزیر خارجہ تون سرجم گپ وتران مس۔ وزیرخارجہ پارے کہ کینیڈین وزیرخارجہ کہوک آتے انصاف نا پورو فراوانی نا باورکرفسا اسلاموفوبیانا ودوک آ رجحان نا برخلاف جہانی کہول آ پاکستان تون اسیجائی کوشست آتے کاریم اٹ اتنگ نا سلاہ تسنے۔ کینیڈین وزیراعظم جسٹن ٹروڈو نا مثبت ردعمل نا خیرمقدم ءِ کینہ۔ شاہ محمود قریشی پارے کہ کینیڈاٹی ننا سفارت خانہ، کہوک آتا خاہوت تون پدریسہ رابطہ ٹی ءِ اوفتے ہروڑنا کمک فراوان کینہ۔ اسلاموفوبیا و خارتس بیانیہ نا بیخ کشی کن جہانی کہول آ گچین گام گیج کننگ نا گرج ءِ۔ گورنرپنجاب دیکی ملک آتے ٹی اسلاموفوبیانا ودوک آ رجحان نا توننگ کن وزیرخارجہ نا کنڈآن کروک آ گچین کوشست آتا ستاءِ کرے۔
