اسلام آباد۔ 11جون (اے پی پی) چیئرمین سی پیک اتھارٹی جنرل عاصم سلیم باجوہ پارینے کہ پاک چین اقتصادی راہداری نا رداٹ صنعتکاری ءِ مون آ دننگ حکومت نا اولیت ءِ تانکہ زرگزران شون ہلے کٹیا ودے وبے روزگاری کم مرے۔ صنعتکاری اسہ اہم ءُ ہدف اسے ہراڑکن زرکارآتے ہروڑنا آسراتی ایتنہ۔ ہندی وڑاٹ درآمدی مال انا گیگ بدل تیار کروک آ و برآمدی صنعت آتے اولیت تننگک۔ جنرل عاصم سلیم باجوہ داہیت ءِ اسلام آباد نا پنی آ صنعتکار آتا اسہ ڈل اسے تون خصوصی اوڑدہی ٹی پارے۔ ہراٹی اسلام آباد چیمبر نا صدر سردار یاسر الیاس خان، اسلام انڈسٹریل ایسوسی ایشن نا صدر طارق صادق و اول نائب صدر عمیس خٹک، خالد جاوید، شیخ عامر وحید و چیف کوآرڈنیٹر ملک سہیل حسین ئسک اوار ئسر۔ جنرل باجوہ پارے کہ اسلام آباد نا صنعتی برادری نا کنڈآن پوسکن آ انڈسٹریل اسٹیٹ نا سلاہ و خصوصی اکنامک زون جوڑ کننگ نا پروپوزل نا سرجم جاچ ءِ ہلنگ انگ ءِ و دارداٹ زوت فیصلہ کننگک۔ داکان مست پنی آ صنعت کار خالد جاوید اودے پارے کہ اسلام آباد انڈسٹریل اسٹیٹ اٹ پین صنعت آتا گنجائشت اف و پلاٹ آک ہم کبین ءُ ہراڑآن کارخانہ غاتا ودکی و پوسکن آ زرکاری زہمی مننگ ءِ۔ اوخواست کرے کہ سی پیک روٹ آ ہکلہ ڈی آئی خان موٹروے آ ڈغار ارے ہراڑے انڈسٹریل اسٹیٹ جوڑ کننگے۔ طارق صادق پارے کہ ہکلہ ڈی آئی خان موٹروے آ انڈسٹریل اسٹیٹ نا جوڑ کننگ کن سی ڈی اے و آر ڈی اے ءِ ہم سلاہ تننگانے ہراڑآ او سجفنگ ءِ۔
