اسلام آباد۔ 11جون (اے پی پی) وزیر مملکت حوالکاری وشینکاری فرخ حبیب پارینے کہ آئی ایم ایف نا غٹ تر خواست آتیان پد ہم وزیراعظم الس ءِ ریلیف تننگ کن بجلی نا نہاد آتے ودفپننگ و 150ارب نا ڈائریکٹ خراج خلپننگ نا فیصلہ کرینے، غٹ زرگزرانی ٹک آک مثبت ءُ، ساڑی حکومت اوورسیزپاکستانی تے وونٹ انا حق تننگ کن الیکشن ترمیمی بل اس منظور کرینے، پیشن نا ملک آتے ٹی رہینگوک آ پاکستانیک داسال انا اولیکو 11تُو اٹی ریکارڈ 26.7بلین ڈالرز ترسیلات زر پاکستان آ مون تسر۔ جمعہ نادے آ تینا ٹویٹ و بلاول زرداری نا بیان آ ردعمل اٹ وزیر مملکت حوالکاری و شینکاری فرخ حبیب پارے کہ تدوک آ دے قومی اسمبلی آن الیکشن ترمیم بل منظور مس۔ پیشن نا ملک اٹی رہینگوک آپاکستانیک ننا ملک انا میرات ءُ۔ تینا بیان اٹی وزیر مملکت فرخ حبیب پارے کہ حکومت نا الس دوست گام گیج آتا سوب آن لس الس نا ہلنگ نا وس اٹ 36.6درسد ودکی مسنے، ننا برآمد آتے ٹی 13درسد ودکی مس ہرااسہ پوسکن ءُ ریکارڈ اسے، تعمیرات اتون اوار ہربشخ اتون گنڈوک لیبرنا روزانہ ٹی 29درسد اسکان ودکی مسنے، لارج اسکیل مینو فیکچرنگ نا بشخ انا شرح نمو 9درسد مس۔ اوپارے کہ کرنٹ اکاؤنٹ نسخان دہ تُو آن سرپلس ءِ۔ ایف بی آر اولیکو 11 تُو اٹی 4170ارب روپئی خراج وصول کرینے، کشاری بشخ انا شرح نمو 2.77درسد، پرائمری بیلنس پنچ سال اٹی اولیکو وار سرپلس مسنے۔ وزیر مملکت فرخ حبیب پارے کہ جہانی مارکیٹ اٹ بورہ، خام تیل، پٹرولیم مصنوعات، کنوئی آ تیل و ایلو گڑاتا نہاد آتے ٹی ودکی آن پد ہم حکومت السءِ ریلیف فراوان کرینے، پام آئل نا نہاد جہانی منڈی ٹی 102درسد ودانے، نن بیرہ 20درسد ودکی کرین۔ جہانی منڈی ٹی سویابین آئل نا نہاد 119درسد ودانے نن بیرہ 23درسد ودکی کرینن، خام تیل انا نہاد اٹی جہانی منڈی ٹی 119درسد نا ودکی مسنے نن بیرہ 32درسد نہادآتے ودفینن۔ اوپارے کہ روشن ڈیجیٹل اکاؤنٹ اٹ اسہ ارب ڈالر آن زیات بسنے۔ حکومت نا پالیسی تیان زرگزران سوگو مسنے۔ اوپارے کہ مک اٹ ڈیم جوڑ کننگ اُن، ننے اڑزآن بجلی نا گرج ءِ، چنکو وام تننگ انگ ءِ، پاکستان اٹی شونداری نا روشنا دور بناکرینے۔
