اسلام آباد۔ 11جون (اے پی پی) وزیراعظم نا خصوصی کمکار موسمیاتی بدلی ملک امین اسلم پارینے کہ حکومت موسمیاتی بدلی و اونا اثرآتیان ودی مروک آ چیلنج آتون مون تننگ کن جوان ڈٹ بندی نا رداٹ پبی گام گیج کرینے، ساف و سرسوز تحریک نا رداٹ ٹین بلین ٹری سونامی کون آ انقلابی ڈٹ آک ملک اٹی قدرتی چاگڑد نا رکھ و بحالی کن دوررس بھرم نا حامل جوڑ مریرہ، دابابت مخلوق ءِ رویہ غاتے ٹی بدلی اتنگ نا گرج ءِ۔ اوجمعہ نادے آ داڑے وزارت موسمیاتی بدلی و یونیسیف نا شریداری اٹ موسمیاتی بدلی و اونا اثرآتا بابت اڈہلوک آ دود آن تران کریکہ۔ دود اٹی موسمیاتی بدلی نا چناتیااثرآتون اوار چندی حوال آتے ہم جاری کننگا۔ ملک امین اسلم پارے کہ پاکستان اٹ موسمیاتی بدلی نا منفی اثرآتیان چناک ہم زہمی ءُ، موسمیاتی بدلی نا اثرآتا سوب آن درجہ حرارت اٹ ودکی مسنے، داوخت آ ملک اٹی باسنی نا ریسہ ہندا موسمیاتی بدلی تا بھرم ءِ و داڑآن چناک زہمی ءُ۔ امین اسلم پارے کہ ننے داچیلنج آتون مون تننگ کن پبی گام گیج کننگ نا گرجءِ۔ اوپارے کہ حکومت داچیلنج آتا مون ءِ توننگ کن ڈٹ تیار کرینے، بلین ٹری سونامی تون اوار چاگڑدی رکھ و بحالی نا ڈٹ آک داکوشست آتا بشخ ءُ۔ اوپارے کہ پاکستان چاگڑدی بدلی نا سوب جوڑ مروک گرین ہاؤس گیس آتا پیش تمنگ نا زموارمفننگ و ناگہانی آفت آتا دروشم اٹ بھلونسخان اس سگنگ آن پد ہم چاگڑدی انحطاط ءِ توننگ و ایکو سسٹم نا بحالی کن سرکڑدہ ئی کڑد ادا کننگ ءِ۔ ملک امین اسلم پارے کہ داغٹ آک وزیراعظم عمران خان نا ساف وسرسوز پاکستان ویژن نا بشخ ءِ، دانا مسخت پاکستان نا آخبت ءِ رکھوک کننگ و بروک آ چین تے پائیدار و جان جوڑ افزا چاگڑد فراوان کننگ ءِ۔ اوپارے کہ حکومت موسمیاتی بدلی تون مون تننگ کن چاگڑدی ڈٹ آتے کن فنانسنگ نا گرج آتا رداٹ بجٹ ءِ ودفینے وخت اس کہ دارداٹ ایلو وسیلہ غاتے کاریم اٹ اتنگ کن ہم گام گیج کننگ انگ ءِ۔ اوپارے کہ قدرتی چاگڑد بریبری ناخواست کیک، دابابت ننے تینا رویہ غاتے ٹی بدلی اتنگ نا گرج ءِ۔
