اسلام آباد۔ 10جون (اے پی پی) وزیراعظم عمران خان غٹ بنجائی وزارت و صوبائی حکومت آتے پارت کرینے کہ زرکاری ءِ مون آ دننگ کن پک کروک ہدف آتے وخت آ پورو کننگے، زرکارآتے کاروبار کننگ کن آسانی فراوان کننگے، زرگزرانی سوگوی ءِ برقرار تخنگ و ترند تر زرگزرانی شونداری کن زرکاری اہم انگا جزو ءِ۔ داخیال آتا درشانی ءِ او تینا کماشی ٹی زرکاری و کاروباراٹی مون تروک اڑاند آتے مر کننگ نا بابت جاچ دیوان آن تران کرسا کرے۔ وزیراعظم آفس نا میڈیا ونگ انا کنڈآن جاری بیان نا رداٹ دیوان اٹی خصوصی کمکار ڈاکٹر معید یوسف، ڈاکٹر شہباز گل تعلقدار وزارت آتا سیکرٹریک، چیئرمین نیپرا، ہرچار آ صوبہ غاتا سیکرٹریک ویڈیو لنک انا کمک اٹ، و سینئر آفیسر آک بشخ ہلکر۔ سیکرٹری زرکاری بورڈ دیوان ءِ ہموغٹ گام گیج آتا بارواٹ معلومدار کرے ہرازرکاری و کاروبار اٹ اڑاند آتے چٹفنگ کن ہلنگانو۔ داگام گیج آتے ٹی کانود اٹی ترمیم، خراج وصولی تا وڑوڈول اٹ آسانی وایلومحکمہ غاتیان این او سی نا زوت دوئی کننگ نا وڑوڈول ءِ آسان کننگ، بے گرج ومتکن آ ضابطہ کار اٹ ترمیمک اوار ءُ۔ وزیراعظم پارت کرے کہ غٹ بنجائی وزارت و صوبائی حکومت آک زرکاری ءِ مون آ دیر، و دارداٹ پک کروک ہدف آتے وخت آ پورو کیر۔
