اسلام آباد۔ 10جون (اے پی پی) وزیراعظم نا خصوصی کمکار تخفیف نیزگاری و راجی رکھ ثانیہ نشتر پارینے کوویڈ۔ 19نا مشکل حالیت آتے ٹی 15ملین بندغ آتے مالی کمک نا وڑاٹ 179ارب روپئی تننگا۔ آسان وام تا آسراتی ءِ 10ضلع غاتیان ودفسا 28ضلع غاتسکان وخت اس کہ بے سود وام تا فراوانی نا دنگ ءِ 138ضلع غاتسکان ودفنگک۔ کوویڈ۔ 19اٹی نن تینا ایلو ڈٹ آتا ہدف آتے ہم دوئی کرینن۔ داخیال آتا درشانی ءِ او پنچ شنبے نادے آ وزیرخزانہ شوکت ترین تون اوار اقتصادی جاچ رپورٹ نا جاری کننگ نا وخت آ پریس کانفرنس آن تران کرساکرے۔ اوپارے کہ اِراسال مست احساس پروگرام نا لائحہ عمل جوڑ مسوسس، اولیکو سال دانانن انتظامی پنجر ءِ جوڑ کرین و دانا انفراسٹرکچر ءِ ڈویلیپ کرین۔ اوپارے کہ کوویڈ۔ 19نا جہانی دین انا سوب 24ملین بندغ ہرادیہاڑی دار یا لس بندغ ئسر، اوفتا زرگزران نا پہیہ یکایک سلیس و او مشکل آتا گواچی مسر۔ حکومت دمدستی وڑاٹ اوفتا مشکل آتے کم کننگ کن احساس پروگرام نا رداٹ 15ملین مخلوق ءِ 179ارب روپئی نا مالی کمک فراوان کننگا، کوشست ئس کہ شفاف، منظم و بے کنڈ ہلوک حکمت عملی نا رداٹ کاریم کین و بھلو حد اسکان نن داٹی سرسہب مسن۔ نن کوویڈ۔ 19اٹی نیزگار بندغ آتا مالی کمکاری تون اوار اوار تینا ایلو ہدف آتیاہم نظر شاغانن واوفتے نن دوئی کننگ اٹ سرسہب ہم مسن۔ دن ءُ ہیت اس اف کہ نن کوویڈ۔ 19اٹی تینا ایلو ہدف آتے دوئی کتون بلکن گچین حکمت عملی نا رداٹ احساس پروگرام نا غٹ ڈٹ آتے برجاتخنگا۔ ہراتم نن بھاز متحرک وڑاٹ کوویڈ۔19نا سوب مالی مشکل آتا گواچی بندغ آتے کیش فراوان کرینہ۔
