اسلام آباد۔ 10جون (اے پی پی) بنجائی وزیر خزانہ و محصولات شوکت ترین اینخو مالی سال انا اقتصادی حالیت آتا سرجم احاطہ غا مبنی ”پاکستان اکنامک سروے 2020-21“ ءِ جاری کرینے ہرانا رداٹ اینخو مالی سال اٹی زرگزرانی شرح نمو 4 درسد آن زیات مریک، ترسیلات زر 20ارب ڈالر آن ودانے، برآمدآتے ٹی ودکی مسنے، لارج اسکیل مینو فیکچرنگ نا بشخ انا شرح نمو 9 درسد، کشاری بشخ انا شرح نمو 2.77درسد، کرنٹ اکاؤنٹ نسخان دہ تُو آن سرپلس ءِ، ایف بی آر نا خراج وصولی 42کھرب اسکان سرمسنے، اینخو سال مارچ انا ایسر اسکان کل ملکی وامک 380کھرب روپئی ءُ، پرائمری بیلنس پنچ سال اٹی اولیکو وار سرپلس مسنے، جہانی مارکیٹ اٹی بورہ، خام تیل، پٹرولیم مصنوعات، کنوئی آتیل و ایلو گڑاتا نہاد آتے ٹی ودکی آن پد ہم حکومت الس ءِ ریلیف فراوان کرینے، کشت وکشار، صنعت، تعمیرات و ایلو بشخ آتے آسودہی تننگانے، چاگڑدی کچٹی تون مون تننگ کن بلین ٹری ڈٹ انا بناءِ کننگانے، گڑاتا نہاد آتے ٹی زرس ودکی کرینن۔ روشن ڈیجیٹل اکاؤنٹ اٹ اسہ ارب ڈالر آن زیات بسنے، جہانی بینک احساس پروگرام نا ستاءِ کرینے، سرسہب ورناپروگرام آن ملک انا ورناتے فائدہ مریک، حکومت نا پالیسی تیان زرگزران سوگو مسنے، داسہ ننے سوگوی اٹ نمونا کنڈآ ہنوئی مریک، بروک آ مالی سال انا بجٹ اٹ نیزگارآتا خیال ءِ تخنگک۔ اوپنچ شنبے نادے آ داڑے اسہ پریس کانفرنس اسے ٹی بروک آ مالی سال 2021-22نا بجٹ آن مست دااہم زرگزرانی دستاویزءِ جاری کرے۔ داوخت آ اوڑتون اوار بنجائی وزیر صنعت و پیدوار مخدوم خسروبختیار، احساس پروگرام نا چیئرپرسن و سینیٹر ڈاکٹر ثانیہ نشتر، وزیراعظم نا سلاہکار واپار عبدالرزاق داؤد و خصوصی کمکار محصولات ڈاکٹر وقار مسعود ئسک ہم ساڑی ئسر۔ بنجائی وزیر خزانہ شوکت ترین پارے کہ کورونا دین انا خوفناک دین و اونا منفی زہم تیان پد ہم حکومت نا گچین پالیسی تیان قومی زرگزران سوگو مننگ بناکرینے، دین اٹی مینو فیکچرنگ، ٹیکسٹائل، کشت وکشار و تعمیراتی بشخ ءِ آسراتی تننگا، اینخو مالی سال اٹی لارج اسکیل مینو فیکچرنگ نا بشخ انا نمو 9 درسد، کشت وکشار نا 2.77درسد ءِ، گنڈیری، برنج، خولم وایلو فصل آتا ریکارڈ پیدوار مسنے، ترسیلات زراٹی ہم ریکارڈ ودکی مسنے و دا 20ارب ڈالر آن ودانے،مالی سال انا ایسر اسکان 29 ارب ڈالر اسکان ہِننگ کیک۔ اوپارے کہ پاکستان مہالو کنوئی آ گڑاتا برآمدکروک آ ملک ئس، داسہ نن درآمد کروک آ ملک جوڑ مسونن، اینخو مالی سال اٹی برآمد آتے ٹی ہم ودکی مسنے، ترسیلات زر اٹی ودکی آن داہیت پک مریک کہ پیشن نا ملک رہینگوک آ پاکستانیک وزیراعظم عمران خان تون خاص لگاؤ تخرہ، کرنٹ اکاؤنٹ نسخان ننا دہ تُوآن سرپلس ءِ، فنانشل ایکشن ٹاسک فورس انا بروک آ جاچ اٹی ننے ریلیف ملنگ کیک، ایف بی آر نا خراج وصولی ٹی اینخو مالی سال انا 11 تُو اٹی گچینی بسنے و دا4.2ٹریلین مسنے ہراتدوک آ سال آن زیات ءِ۔ اوپارے کہ بروک آ مالی سال انا خراج وصولی نا ہدف 58کھرب روپئی تخنگانے، پرائمری بیلنس پنچ سال اٹی اولیکو وار سرپلس مسنے، پاکستان خولم، بورہ، سی و دال درآمد کننگ ءِ، جہانی مارکیٹ اٹی داگڑاتا ہرانہاد مریک اوفتا اثرننے آہم تمک۔ اوپارے کہ بورہ نا نہاد 12تُواٹی جہانی مارکیٹ اٹی 58درسد ودانے، نن بیرہ 19درسد نا ودکی کرین، پام آئل نا نہاد جہانی منڈی ٹی 102درسد ودانے، نن بیرہ 20درسد نا ودکی کرینن، جہانی منڈی ٹی سویابین آئل نا نہاد 119درسد ودانے نن بیرہ 23درسد ودکی کرینن، خام تیل انا نہاد اٹی جہانی منڈی ٹی 119درسد نا ودکی مسنے نن بیرہ 32درسد نہاد ءِ ودفینن۔ اوپارے کہ کشت وکشار نا شونداری آ خاص چکار کننگ نا گرج ءِ، حکومت داڑآ گام گیج کننگ ءِ ہراڑآن آڑھتی آن کشارگرآتا جان چٹک، انتظامی پنجرءِ ہم گچین کروئی تمک، پاکستان نا اسٹاک مارکیٹ دنیا نا چارمیکو بھلا و ایشیانا گچین اسٹاک مارکیٹ ءِ، اینخو سال مارچ انا ایسراسکان ملک انا جم وامک 38ٹریلین روپئی ءُ۔ 2020-21ء ٹی داکان تدوک آ مالی سال انا مقابلہ ٹی 17کھرب نا ودکی مس۔ وزیرخزانہ پارے کہ شیفکو تپہ ءِ آسراتی تا فراوانی کن احساس پروگرام اسہ گچین ءُ پروگرام اسے و جہانی بینک ہم داناستاءِ کرینے، سرسہب ورناپروگرام آن ورناتے فائدہ مریکم، چاگڑدی کچٹی نا ویل اتون مون تننگ کن دہ بلین ٹری سونامی نا رداٹ اسہ ارب درخت خلنگانے۔ اوپارے کہ روزگار نا وارخواہی شرح نمو ودنگ آن ہی ودی مریک، بجٹ اٹ غریب آتا خیال ءِ تخنگک، مستین اٹ بیرہ غریب آتے تغ نشان ترسا کننگا، اگہ شرح نمو پائیدار مریک تو نیزگاری ٹی ہم کمتی بریک۔
