وزیرداخلہ شیخ رشید احمد تون پاکستان کن امریکی وزارت خارجہ نا ڈپٹی اسسٹنٹ سیکرٹری لیسلی وی ویگیوری نا اوڑدہی

اسلام آباد۔ 10جون (اے پی پی) وزیرداخلہ شیخ رشید احمد تون پاکستان کن امریکی وزارت خارجہ نا ڈپٹی اسسٹنٹ سیکرٹری لیسلی وی ویگیوری پنچ شنبے نادے آ داڑے اوڑدہی کرے ہراٹی پاک امریکہ ہڑتوم آ کنڈآتا تعلقداری تون اوار تین پہ تینی است خواہی نا باندات آ گپ وتران کننگا۔ وزارت داخلہ نا کنڈآن جاری بیان نا رداٹ اوڑدہی ٹی امریکی صحافی ڈینیل پرل خون کیس اٹ اوار ڈوہدار عمرشیخ، انسانی اسمگلنگ و منشیات نا توننگ نا بابت گام گیج و ایلو امور آہم گپ وتران کننگا۔ امریکی ڈپٹی اسسٹنٹ سیکرٹری انسانی اسمگلنگ و منشیات نا توننگ کن پاکستان نا ساڑی آ کوشست آتا ستاءِ کرسا پارے کہ انسانی اسمگلنگ و منشیات نا کیس آتے ٹی کارروائی ءِ پین ترند کننگ نا خواہندار اُن۔ وزیرداخلہ شیخ رشیداحمد پارے کہ انسانی اسمگلنگ نا توننگ کن حکومت اِراپوسکن ءُ کانود نافذکرینے، اومیت ءِ پوسکن آ کانود پاکستان اٹ انسانی اسمگلنگ نا چٹفنگ کن بھاز کمکارجوڑمریک۔ اوپارے کہ انسانی اسمگلنگ نا توننگ کن پاک۔اوغان سیم آ باڑہم بھاز گچین پک مننگ ءِ، پاکستان تدوک آ سال انسانی اسمگلنگ اٹ اوار اِراہزار آن زیات بندغ ءِ دزگیرکرینے۔ وزیرداخلہ پارے کہ انسانی اسمگلنگ اٹ اوار بندغ آک ہچ ءُ رعایت اسے نا حقدار افس، اوکانود نا رداٹ سزاکنیرہ۔ امریکی ڈپٹی اسسٹنٹ سیکرٹری پارے کہ انٹرنیشنل نارکوٹکس اینڈلاانفورسمنٹ(آئی این ایل) چندی کانودنافذکروک آ ادارہ غاتے کمک فراوان کننگ ءِ۔ اومیت ءِ منشیات نا چٹفنگ نا کانود اٹ اصلاحات کن ادارہ نا کمکارجوڑمریک۔ وزیرداخلہ شیخ رشید احمد پارے کہ پاکستان اٹ منشیات کنٹرول نا بابت سخت ترین سزاساڑی ءِ۔ اوامریکی ڈپٹی اسسٹنٹ سیکرٹری ءِ باورکرفے کہ پاکستان منشیات نا توننگ نا بابت مثبت سلاہ تا ستاءِ کیک۔ امریکی ڈپٹی اسسٹنٹ سیکرٹری پارے کہ ڈینئیل پرل کیس اٹ اوار عمرشیخ نا رہائی نا معاملہ ءِ امریکہ بھاز سنجیدگی اٹ ہرک۔ وزیرداخلہ پارے کہ عمرشیخ نا رہائی نا برخلاف سندھ و بنجانا اپیل آک دائر مسنو۔ عمرشیخ نا رہائی نا برخلاف حکومتی اپیل آ سپریم کورٹ اٹ کارروائی پدریسہ برجاءِ، سپریم کورٹ نا حتمی فیصلہ ءِ مو ن آ تخسا عمرشیخ نا معاملہ ءِ ہُننگک۔ امریکی ڈپٹی اسسٹنٹ سیکرٹری پارے کہ عمرشیخ نا رہائی نا برخلاف حکومتی گام گیج آتے قدر انا نظراٹ ہرنہ۔