اسلام آباد۔ 10جون (اے پی پی) وزیرخارجہ مخدوم شاہ محمود قریشی پنچ شنبے نادے آ امریکی ایوان نمائندگان نا خارجہ امور کمیٹی نا چیئرمین گریگوری ویلڈن میکس اتون ویڈیولنک انا کمک اٹ رابطہ کرے۔ ہڑتوم آ راہشون تا نیام اٹ گپ وتران اٹی پاکستان وامریکہ نا نیام اٹ ہڑتوم آ کنڈآتا تعلقداری، اسلاموفوبیا نا ودوک آ کچ و اہم علاقائی و جہانی امور آ گپ وتران کننگا۔ وزیرخارجہ داوخت آ گپ وتران کرسا پارے کہ پاکستان و امریکہ نا نیام اٹ دیرینہ و ہڑتوم آ کنڈآتا تعلقداری ءِ، ڈیہہ ٹی امن نا بابت ہڑتوم آتا سوچ اسہ وڑ ءِ۔ شاہ محمود قریشی پارے کہ پاکستان، اوغانستان تون اوار ڈیہہ ٹی امن نا خواہندار ءِ، پاکستان تینا چکار ءِ جغرافیائی اقتصادی اولیت آتیا کرینے۔ شاہ محمود قریشی پارے کہ پاکستان و ڈیہہ نا اقتصادی شونداری کن اوغانستان اٹی امن المی ءِ، ڈیہہ ٹی رابطہ غاتا مون آ دننگ کن امن بنداوی گرج ءِ۔ اوپارے کہ ڈیہہ ٹی امن کن پاکستان و امریکہ نا نیام اٹ کمکاری، گچین نتیجہ غاتا دوئی کننگ کن اہمیت تخک۔ نیویارک اٹی اقوام متحدہ جنرل اسمبلی نا ہلہلہ ئی دیوان نا وخت آ کنا امریکی پارلیمنٹ نا باسک آتون رابطہ بھاز فائدہ ئی مس۔ شاہ محمود قریشی پارے کہ ای اوفتے اہم علاقائی وجہانی باندات نا بابت پاکستان نا موقف آن معلومدارکریٹ۔ وزیرخارجہ امریکی ایوان نمائندگان نا قائمہ کمیٹی امور خارجہ نا چیئرمین ءِ مچ آ دنیا ٹی اسلاموفوبیا نا ودوک آ رجحان آ پاکستان نا گڑتی آن معلومدار کرے۔ پاکستان، اقوام متحدہ تون اوار چندی جہانی فورم تیا،م خارتس بیانیہ و اسلاموفوبیا نا ودوک آ رجحان نا برخلاف پدریسہ توار بڑز کننگ ءِ۔ اسلاموفوبیا نا توننگ و ”پرامن بقائے باہمی“ ءِ پک کننگ کن جہانی برادری ءِ اسیجائی گام گیج ہرفوئی مریک۔ چیئرمین امریکی پارلیمنٹ فارن افیرز کمیٹی پارے کہ پاکستان ڈیہہ نا اہم ءُ ملک اسے، ڈیہہ ٹی امن و سوگوی کن پاکستان نا کوشست آک سفت نا قابل ءُ۔ امریکی ایوان نمائندگان نا خارجہ امور کمیٹی ناچیئرمین گریگوری ویلڈن میکس کینیڈاٹی رہینگوک آ پاکستانی خاہوت تون پیش بروک آ است ہسون واقعہ و 4کودک شاری تا زوال آ وزیرخارجہ تون ہڑزخواہی کرے۔
