اسلام آباد۔ 10جون (اے پی پی) بنجائی وزیر انسانی حق ڈاکٹر شریں مزاری پارینے کہ حکومت چناتا حق انا رکھ و اوفتیان کاریم ہلنگ نا غٹ دروشم آتا چٹفنگ کن تینا عزم انا درشانی ءِ کیک۔ داخیال آتا درشانی ءِ او پنچ شنبے نادے آ داڑے چائلڈ لیبر نا برخلاف جہانی دے انا وخت آ اعتزاز حسن چائلڈ پروٹیکشن انسٹی ٹیوٹ نا بنائی دود آن تران کرساکرے، داوخت آ بنجائی سیکرٹری انسانی حق انعام اللہ خان ہم ساڑی ئس۔ اسلام آباد اٹی جوڑ مروک آ دا انسٹیٹیوٹ وزارت انسانی حق انا کوشست آتیان منظور مروک آ اسلام آباد کیپٹل ٹیریٹری چائلڈ پروٹیکشن ایکٹ 2018ء نا رداٹ جوڑ کننگانے۔ دا انسٹی ٹیوٹ نا بنداوی مسخت چناتے ہروڑنا جونی و ذہنی تشدد، نسخان، اوفتے گوجالنگ، بدسلوکی، استحصال و بدسلوکی آن رکھ فراوان کرسا پسماندہ و خطرہ غاتیان دوچار چناتے خذمت آتا فراوانی ءِ۔ داوخت آ تران کرسا ڈاکٹر شیریں مزاری پارے کہ چناتا حق ءِ پک کننگ ساڑی حکومت نا اسہ اولیت ءِ، و پوسکن آ چائلڈ پروٹیکشن انسٹی ٹیوٹ آف پاکستان اٹ چناتتون بیدادی، تشددو استحصال نا توننگ کن کروک آ کوشست آتا اسہ اہم ءُ مزل اسے۔ داادارہ سٹریٹ چلڈرن، کاریم کننگ نا گواچی چنا، انسانی اسمگلنگ، بے گواہ ولاوارث مروک آ چناتا رکھ، ہنکین، سلابت، اوفتا خاہوت نا پٹنگ و داچناتا ہراعتبار اٹ بحالی نا خذمت فراوان کیک۔
