اسلام آباد۔ 10جون (اے پی پی) سمندر پار پاکستانی تا ترسیلات زر اٹی برجا مالی سال انا اولیکو 11 تُواٹی تدوک آ مالی سال انا ہندا مد انا مقابلہ ٹی ریکارڈ 29.4درسد ودکی مسنے۔ اسٹیٹ بینک انا رپورٹ نا رداٹ برجامالی سال انا اولیکو 11 تُو اٹی سمندر پار پاکستانیک 26.736ارب ڈالر نا زرمبادلہ ملک آ مون تسر ہراتدوک آ مالی سال انا ہندا مد انا مقابلہ ٹی 29.4درسد زیات ءُ۔ تدوک آ مالی سال انا ہندا مداٹی سمندر پار پاکستانیک 20.659ارب ڈالر نا زررمبادلہ مون تسوسر، مئی 2021ء ٹی سمندرپارپاکستانی تا ترسیلات زر انا کچ 2.490ارب ڈالر ریکارڈ کننگا۔ تدوک آ سال مئی ٹی دا کچ 1.865ارب ڈالر ریکارڈ کننگاسس۔ اسٹیٹ بینک نا رداٹ ترسیلات زر انا بابت سعودی عرب غٹ آن بھلا ملک انا وڑاٹ مون آ بسنے ہراڑے کاریم کروک آ پاکستانی خواری کش آک مالی سال انا اولیکو 11 تُواٹی 7.010ارب ڈالر نا زرمبادلہ مون تسر ہراتدوک آ مالی سال انا ہند امدانا مقابلہ ٹی 19.5درسد زیات ءُ۔ تدوک آ مالی سال انا ہندا مد اٹی سعودی عرب اٹ کاریم کروک آ پاکستانی خواری کش آک 5.865ارب ڈالر نا زرمبادلہ ملک آ مون تسوسر۔ یواے ای 5.888ارب ڈالر اتون ارٹ میکو بھلا ملک ءِ ہراڑے رہینگوک آ پاکستانیک برجامالی سال انا اولیکو 11 تُواٹی تدوک آ مالی سال انا ہندا مد انا 5.095ارب ڈالر نا مقابلہ ٹی 9.7ملین ڈالر نا ودکی زرمبادلہ ملک آ مون تسر۔ یوکے ٹی رہینگوک آ پاکستانیک برجامالی سال انا اولیکو 11 تُو اٹی 3.696ارب ڈالر نا زرمبادلہ ملک آ مون تسر ہراتدوک آ مالی سال انا ہندا مد انا مقابلہ ٹی 66.6درسد زیات ءُ، یوکے ٹی رہینگوک آ پاکستانیک تدوک آ مالی سال انا ہندا مد اٹی 2.219ارب ڈالر نا زرمبادلہ ملک آ مون تسوسر۔ امریکہ ترسیلات زرانا بابت چارمیکو بھلا ملک ءِ۔ امریکہ ٹی کاریم کروک آ پاکستانی خواری کش آک برجامالی سال انا اولیکو 11 تُو اٹی 2.477ارب ڈالر نازرمبادلہ ملک آ مون تسر ہراتدوک آ مالی سال انا ہند امد انا مقابلہ ٹی 58.1درسد زیات ءُ۔ تدوک آمالی سال انا ہندا مداٹی امریکہ ٹی کاریم کروک آ پاکستانی خواری کش آتا ترسیلات زر انا کچ 1.566ارب ڈالر مسوسس۔ ساڑی حکومت نا کنڈآن کانودی و بینکنگ ذریعہ اٹ ترسیلات زرانا است بڈی کن آسراتی و گام گیج آتے ٹی ترسیلات زر اٹی پدریسہ ودکی مننگ ءِ۔
