کوئٹہ۔ 10جون (اے پی پی) ترجمان حکومت بلوچستان لیاقت شاہوانی پارینے کہ کورونا دین انا مسٹ میکو ریسہ بھاز خطرناک ءِ، صوبائی حکومت اونا توننگ کن ہروڑاٹ گام گیج کننگ ءِ، دارداٹ الس ءِ ہم راجی فاصلہ و فیس ماسک انا کاریم اٹ اتنگ تون اوار غٹ رکھی گام گیج آتیا سختی اٹ عمل درآمد کننگ نا گرج ءِ، صوبہ ٹی کورونا دین آن بچنگ نا ویکسی نیشن مہم ءِ ترند کننگانے۔ وخت اس کہ دابابت صوبائی ٹاسک فورس اس ہم جوڑ کننگانے۔ ساڑی حکومت ٹیسٹنگ کیپسٹی ءِ ودفنگ کن ہم ہروڑاٹ گام گیج کننگ ءِ۔ داخیال آتا درشانی ءِ او پنچ شنبے نادے آ ”اے پی پی“ تون گپ وتران کرسا کرے۔ ترجمان حکومت بلوچستان لیاقت شاہوانی پارے کہ کورونا اسہ ہلوک ءُ دین اسے نا دروشم ءِ اختیار کرینے ہنداخاطرآن رکھی گام گیج اختیار کننگ وخت انا اہم ءُ گرج اس جوڑ مسنے۔ اوپارے کہ داہلوک آ دین آن پک رکھ اکن غٹ باشعور الس صوبائی حوکمت تون دابابت کمک کیر۔ اوپارے کہ کورونا دین انا مسٹ میکو ریسہ نا شدت ءِ ہرسا الس تینے و تینا دوست آتا زند انا رکھ ءِ پک کننگ کن تینا کڑد ءِ ادا کے۔ اوپارے کہ صوبائی حکومت نا اولیت ءِ کہ ہرہمو گام گیج ءِ کننگے ہرانا سوب آن دین صوبہ ٹی دینی دروشم اس ختیار کننگ کپ۔ ترجمان حکومت بلوچستان پارے کہ ننا جان جوڑی نا بشخ آ داخہ بھاریم تمپ کہ نظام جان جوڑی کاریم آن سلے۔ ہنداخاطرآن الس ءِ مرے کہ کورونا دین ءِ سنجیدہ ہلسا رکھی گام گیج آتیا عملدرآمد کے و صوبائی حکومت نا کنڈآن بناکروک آ ویکسین مہم ءِ سرسہب کننگ کن تینا کڑد ءِ ادا کیر و دابابت بے بنداو و سٹی آ ہوکاتیا خف توپس۔
