کوئٹہ۔ 10جون (اے پی پی) بلوچستان اسپیشل اکنامک زون نا اسہ اہم ءُ دیوان اس وبائی وزیر صنعت و واپار چیئرمین بلوچستان اسپیشل اکنامک زون اتھارٹی حاجی محمد خان طوراتمانخیل نا کماشی ٹی اڈ ہلک دیوان اٹی صوبائی سیکرٹری صنعت و واپار حافظ عبدالماجد، سیکرٹری کانود محمد اکبرخان حریفال، منیجنگ ڈائریکٹر لسبیلہ انڈسٹریل اسٹیٹ ڈویلپمنٹ اتھارٹی ایوان صنعت و واپار حب انا صدر ڈائریکٹر فنانس گوادر انڈسٹریل اسٹیٹ ڈویلپمنٹ اتھارٹی و ایلوآفیسر آک ساڑی ئسر۔ دیوان اٹی صوبائی وزیرحاجی محمد خان طور اتمانخیل ءِ بلوچستان اٹی زرکاری نا وارخواہی، زرکارآتے تروک آآسراتی، سی پیک ڈٹ، خصوصی اقتصادی زون تیٹی تروک آ آسودہی معدنیات آئی ٹی تعمیراتی صنعتی و سیل وسوات و ایلو بشخ آتا بابت سرجمی اٹ حوال تننگا۔ داوخت آ صوبائی وزیر صنعت وواپار و چیئرمین بلوچستان اسپیشل اکنامک زون اتھارٹی حاجی محمد خان طوراتمانخیل دیوان آن تران کرسا پارے کہ بلوچستان اٹی زرکاری ءِ مون آ دننگ کن وزیراعلیٰ بلوچستان جام کمال عالیانی نا وژن نا رداٹ گام گیج آتا چرجوئی برجاءِ، اوپارے کہ بلوچستان بھاز اہمیت نا حامل ڈیہہ سے انتئے کہ پاکستان سویلی ایشیاٹی زرکاری نا وت جوڑ مننگ والا ءِ داڑآن بلوچستان تینا جغرافیائی اہمیت نا سوب آن واپاری ہند اس جوڑ مریک ہنداخاطرآن وزیراعلیٰ بلوچستان جام کمال خان بلوچستان اٹی زرکاری نا درگہ غاتے ملانے۔ صوبائی وزیر صنعت وواپار و چیئرمین بلوچستان اسپیشل اکنامک زون اتھارٹی حاجی محمد خان طور اتمانخیل پارے کہ بلوچستان اٹی بے شمار نہادی قدرتی وسیلہ ارے ہرافتے ٹی خیسن، کاپر سنگ مر مر کولا و ایلو نہادی معدنیات آک اوار ءُ۔ ولائیو اسٹاک کشت وکشار توانائی فشریز و ایلو بشخ آتے ٹی ہم پین زرکاری نا وارخواہی ساڑی ارے ودا چرجوئی ٹی حکومت پاکستان و ننا صوبائی حکومت نا کنڈآن زرکاری ءِ مون آ دننگ کن انقلابی گام گیج کننگانے و صوبہ ٹی پیشن نا زرکاری کن پبی وارخواہی دوئی ءِ۔
