اسلام آباد۔ 09جون (اے پی پی) اسپیکر قومی اسمبلی اسد قیصر تون چارشنبے نادے آ وزیراعلیٰ خیبرپختونخوا نا خصوصی کمکار معدنیات عارف احمد زئی اوڑدہی کرے۔ داوخت آ گپ وتران کرسا اسپیکر قومی اسمبلی پارے کہ پاکستان قدرتی وسیلہ و معدنیات آتیان شپ ءِ و اوفتے گچین وڑاٹ کاریم اٹ اتنگ آن ملکی ریونیوٹی ودکی مریک۔ اسپیکر پارے کہ پیشن نا زرکارآتے اتسا داڑے زرکاری ءِ مون آ دننگ مریک انتئے کہ صوبہ خیبرپختونخوا ٹی بے تحاشہ معدنی وسیلہ ارے ہراڑآن فائدہ ہرفنگ وخت انا گرج ءِ۔ داکان مست وزیراعلیٰ نا خصوصی کمکار معدنیات نا بابت صوبہ ٹی زرکاری و زرکارآتے تروک آ آسراتی تیان اسپیکر قومی اسمبلی ءِ معلومدار کرے۔ اونا مستی پاننگ ئس کہ خیبرپختونخوا ٹی ضم مروک آ مسکوہی فاٹا نا ضلع غاک معدنی وسیلہ غاتیان شپ ءُ ہرافتے ٹی زرکاری نا بھلو وارخواہی اس ساڑی ءِ۔ خصوصی کمکار عارف احمد زئی پارے کہ پاکستان تحریک انصاف حکومت خواہک کہ پیشن نا زرکاری ءِ مون آ درسا صوبہ ٹی الس ءِ کاروبارناوارخواہی فراوان کننگک۔ اواسپیکر ءِ حکومت نا کنڈآن کروک آ گام گیج آتیان ہم معلومدار کرے۔
