اسلام آباد۔ 09جون (اے پی پی) وزیر خارجہ مخدوم شاہ محمود قریشی پارینے کہ ہیومینیٹیرین رسپانس پلان (ایچ آرپی) جہانی ءِ کاریم اٹ اتسا ہروڑنا اانسانی المیہ تون مون تننگ کن گچین وسیلہ و بست وبند آتے پک کننگ مریک، داپلان آن دیرپا و پائیدار شونداری نا ایجنڈا 2030ء نا ہدف آتا دوئی کننگ اٹ کمک ہم رسینگک۔ ساڑی حکومت ہروڑنا حالیت آتے ٹی بے پرخ ملک اٹ غٹ شاری تے جان جوڑی تون اوار بنداوی آسراتی فراوان کننگ کن پورو وڑاٹ سنبرینگوک ءِ۔ اوچارشنبے نادے آ وزارت خارجہ ٹی حکومت پاکستان و اقوام متحدہ نا شریداری اٹ، پاکستان ہیومینٹیرین رسپانس پلان 2021ء نا رونمائی دود آن تران کریکہ۔ دود اٹی وزیر سیفران صاحبزادہ محبوب سلطان، سیکرٹری خارجہ سہیل محمود، چیئرمین این ڈی ایم اے لیفٹیننٹ جنرل اختر نواز، یواین ریزیڈنٹ کوآرڈنیٹر جولین ہارنیس، چندی ملک آتا سفیر آک، یواین پاکستان نا بڑزکو کمامدارآک، سول سوسائٹی نا نمائندہ غاک و وزارت خارجہ نا سینئر آفیسر آک ساڑی ئسر۔ وزیر خارجہ تینا تران اٹی ہیومینٹیرین رسپانس پلان 2021نا خدوخال ءِ مون آ تخسا، کورونا جہانی چیلنج تون اوار قدرتی آفت و اوغان باہوٹ آتیکن حکومت پاکستان نا کنڈآن کروک آ گام گیج آتے تالان کرے وپارے کہ ایچ آر پی جہانی برادری نا مخ تفی اٹ مرتب کروک آ اسہ ہندن ءُ جامع پلان اسے ہرادے کاریم اٹ اتسا اسہ کنڈ”ہروڑنا انسانی المیہ تون مون تننگ کن گچین وسیلہ و بست وبند آتے پک کننگ مریک۔ داکان بیدس داپلان آن دیرپا و پائیدار شونداری نا ایجنڈا 2030نا ہدف آتا دوئی کننگ اٹ کمک ہم رسینگک۔ وزیر خارجہ پارے کہ پاکستان ہیومینیٹیرین رسپانس پلان 2021، نا مسخت ادارہ و فریق آتا نیام اٹ گچین رابطہ غاتا کمک اٹ قدرتی آفت آتون مقابلہ نا کاریم نا کچ اٹ گچینی و دینی مرض و آفت آتیان رکھ انا لائخی ءِ ودفنگ ءِ۔ اوپارے کہ دا پلان اٹ جان جوڑی، تعلیم، رکھ فوڈ سیکورٹی، شیلٹر و باہوٹ آتے مون تروک چیلنج آتون مون تننگ نا گام گیج آک اوار ءُ۔ شاہ محمود قریشی پارے کہ پاکستان اوغان باہوٹ آتے کرونا دین آن رکھ اکن بلاتخصیص ویکسی نیشن پروگرام اٹ اوار کرینے۔ وزیر خارجہ پارے کہ ساڑی حکومت ہروڑنا حالیت آتے ٹی بے پرخ ملک اٹ غٹ شاری تے جان جوڑی تون اوار بنداوی آسراتی تا فراوانی کن پورو وڑاٹ سنبرینگوک ءِ۔ دودآن سیفران نا وزیر صاحبزادہ محبوب سلطان، چیئرمین این ڈی ایم اے لیفٹیننٹ جنرل اخترنواز، یواین ہائی کمشنر باہوٹ فلیپو گرانڈی، یواین ریزیڈنٹ کوآرڈنیٹر پاکستان، جولین ہارنیس، ڈائریکٹر یواین او چھاوفاسعید ئسک ہم تران کریر۔
