لاہور۔ 09جون (اے پی پی) بنجائی وزیر ریلوائی محمد اعظم خان سواتی پارینے کہ ملت و سرسید ایکسپریس ٹرین تا ڈوک لگنگ اٹ 63مسافر زوال و 107ٹھپی مسنو ہرافتیان 20ٹھپی ہسپتال اٹی درمان مننگ ءُ، 3ٹھپی تا حالیت نازرک ءِ، زوال کروک آتا وارث آتے 15لکھ وخت اس کہ ٹھپی تے 50ہزار آن 3لکھ روپئی اسکان ایتنہ، ہڑتوم آ ٹرین تا بلیک بکس ءِ ہلکونن، جاست وپاست اٹ مسٹ آن چار ہفتہ لگک، ریلوائی ٹریک ءِ دمدستی وڑاٹ سہی کننگ کن 60ارب روپئی درکار ءِ۔ داخیال آتا درشانی ءِ او چارشنبے نادے آ داڑے ریلوائی ہیڈکوارٹرز اٹی پریس کانفرنس آن تران کرساکرے۔ وزیرریلوائی پارے کہ ریلیف آپریشن اٹ اوار ئسٹ و چنکا چنکا گڑاءِ ہراٹ، اِراوار ہسپتال آتیا ہنسا ٹھپی تا عزیز و قریب آتون ہم اوڑدہی کریٹ۔ اوپارے کہ ٹرین تا است ہسون شکست اٹ 63نہادی جان ہنار وخت اس کہ 107مسافر ٹھپی مسر ہرافتیان شیخ زید ہسپتال رحیم یار خان اٹی 20ٹھپی داخل ءُ ہرافتے ٹی 3نا حالیت نازرک ءِ وخت اس کہ اِرٹ آن مسہ مسافر معذور مسنو ہرافتے احساس پروگرام اٹ اوار کننگک۔ اوپارے کہ ریلوائی نا مروجہ کانود نا رداٹ زوال کروک آتے 15لکھ وخت اس کہ ٹھپی تے 50ہزار آن 3لکھ روپئی اسکان ادا کننگک۔ اوپارے کہ ہسپتال اٹی ٹھپی تا رشتہ دار آتون اسہ ریلوائی آفیسر اس ساڑی ءِ ہرااوفتا کن و خور و رہینگ نا بست وبند نازموارءِ۔ اوپارے کہ اوہفتہ اسکان لاہور اٹی ءِ وہردے ریلوائی آفیسر آتون میٹنگ کرسا ریلوائی تون تعلقدار باندات آ شرہ کننگک۔ ٹرین شکست نا سرجم حوال آتے پارسا بنجائی وزیر پارے کہ ملت و سرسید ایکسپریس نا شکست 3:38بجہ غا مس، ملت ایکسپریس نا بوگیک دڑنگسا ایلو ٹریک آ بسر و ایلو کنڈآن اسہ منٹ آن کم وخت اٹی سرسید ایکسپریس بس ہراڑآن ڈوک لگار، 12بوگی ڈی ریل مننگ آن شکست مس ہرادانا اسل سوب ءِ۔ اوپارے کہ 1990آن پد پاکستان اٹی ڈیل ریل مننگ نا سوب داارٹ میکو بھلا شکست ءِ۔ اوپارے کہ کوٹری آن ہلیس خانپور اسکان 520کلومیٹرنا ٹریک خطرناک ءِ، ٹریک 1971نا ءِ ہرادے 20آن 25سال پد اپ گریڈ کروئی ئسک وخت اس کہ سلیپر 2003نا ءُ ہرافتے ٹی 4آن 5درسد سلیپر خراب ئسر، ریسکیوٹرین ءِ ہم سٹارٹ مننگ اٹ 45منٹ لگک دا ٹرین ہم کم و ود دونیم گھنٹہ لیٹ سرمس دامعاملہ ءِ ہم ہُننگ اُن ہراسٹ قصور وار مس اودے معاف کننگپک۔ بنجائی وزیر پارے کہ ننتون 50سال انا متکن آ کوچ آک ءُ اوفتے متکن آ ٹیکنالوجی آن جوڑ جاڑ کیرہ، ملتان آن ہلیس بھکر اسکان 5تُو اٹی ریلوائی ٹریک نا اسہ اسہ انچ انا معائنہ ءِ کرینٹ، سکھر نا ریلوائی ٹریک خطرناک ءِ کیہی وار دانا پیدواری ءِ کرینٹ۔
