اسلام آباد۔ 09جون (اے پی پی) وزیراعظم نا خصوصی کمکار جان جوڑی ڈاکٹر فیصل سلطان پارینے کہ غٹ بالی پٹ آتیا کورونا دین اتون مون تننگ کن پبی و گچین گام گیج آتے پک کننگ اُن، انٹرنیشنل ہیلتھ ریگولیشن نا سلاہ و سوج آتیا عملدرآمد ءِ پک کننگ اُن و بالی پٹ آتیا مسافر آتا اسکریننگ نا گچین و جوان ءُ نظام اس ساڑی ءِ۔ چارشنبے نادے آ اسلام آباد بالی پٹ انا دورہ نا وخت آ اوپارے کہ غٹ بالی پٹ و پوائنٹ آف انٹریز آ ٹیسٹنگ و اسکریننگ نا نظام ءِ سوگو کرینن۔ اوپارے کہ سینٹرل ہیلتھ اسٹیبلشمنٹ نا عملہ دے و نن بھازجوانی اٹ کاریم کننگ ءِ، حکومت کورونا دین آن بچفنگ کن گچین گام گیج کننگ ءِ۔ اوپارے کہ الس ءِ مرے کورونا دین آن بچنگ کن ایس او پی تیا سختی اٹ عمل کے، ماسک ءِ کاریم اٹ اتیر و غٹ اہل بندغ آک ویکسی نیشن ضرور کرفر۔ اوپارے کہ اسلام آباد بالی پٹ آ پیشن آن بروک آ مسافر آتا ہڑدے ئی بنداو آ ریپیڈاینٹی ہرانا کٹ آن ٹیسٹنگ کننگ انگ ءِ۔ اواسلام آباد بالی پٹ آ کورونا دین آن بچفنگ کن اسکریننگ و ٹیسٹنگ نا بست وبند آتا جاچ ءِ ہلک و اسلام آباد بالی پٹ آ سینٹرل ہیلتھ اسٹیبلشمنٹ نا کنڈآن تروک آآسراتی و بست وبند آتا ہم جاچ ءِ ہلک۔ داوخت آ بنجائی سیکرٹری جان جوڑی عامر اشرف خواجہ ہم ڈاکٹر فیصل سلطان تون ساڑی ئسک۔
