لاہور۔ 09جون (اے پی پی) وزیراعظم نا سلاہکار واپار عبدالرزاق داؤد تون پاکستان کارپٹ مینو فیکچررزاینڈ ایکسپورٹرز ایسوسی ایشن نا ڈل اوڑدہی کرسا مینو فیکچررز و برآمد کروک آتے مون تروک ویل و تینا خواست آتا بابت سرجمی اٹ معلومدار کریر۔ گروپ لیڈر عبدالطیف ملک، ایسوسی ایشن نا سینئر وائس چیئرمین ریاض احمد و عثمان اشرف ئسک سلاہکار واپار ءِ معلومدار کریر کہ دُواٹ جوڑ کروک قالین تا خام مال خاص وڑاٹ اوغان باہوٹ آک تیار کیرہ ہرافتے اوکان پد پاکستان آدرآمد کننگک۔ داڑے ساڑی پاکستانی کسبکار دانا ایلو ریسہ غاتے سرترسا دانا پورو تیاری ءِ کیرہ ہرادے اوکان پد دنیا نا چندی ملک آتے ٹی برآمد کرسا ملک اکن نہادی زرمبادلہ دوئی کننگک۔ اوفک سلاہکار واپارعبدالرزاق داؤد آن خواست کریر کہ طورخم بارڈر نا کسر آن اوغانستان آن خام مال نا درآمد آ خلوک غٹ ڈیوٹی و خراج آتے چٹفنگے تانکہ مشکل آتا گواچی داصنعت ءِ ریلیف ملنگ کے۔ سلاہکار واپار عبدالرزاق داؤد پارے کہ پاکستان نا دُواٹ جوڑ کروک قالینک مچ آ دنیاٹی یکتاءُ پہچان اس تخرہ، ننے جہانی منڈی تیٹی گرفت ءِ سوگو کننگ کن تینا مصنوعات آتا آب ءِ پین گچین کروئی مریک و داڑآ ہچ ءُ سمجھوتہ اس کننگپ۔ حکومت برآمد آتا مون آ دننگ کن ہروڑنا گام گیج کننگ ءِ و ہنداسوب ءِ کہ کورونا دین آن پد ہم ننا برآمد آتے ٹی ودکی نا رجحان ءِ۔ اوایسوسی ایشن نا ڈل ءِ باورکرفے کہ دابابت عملی پیش رفت کننگک و بروک آ مالی سال انا بجٹ اٹ خواست آتے ہرممکن پورو کنننگ نا کوشست کننگک۔
