اسلام آباد۔ 09جون (اے پی پی) بنجائی وزیر امور کشمیر و گلگت بلتستان علی امین خان گنڈاپور تون پاکستان اٹی تعینات جرمنی نا سفیر برنارڈشلیگ ہیک اوڑدہی کرے۔ اوڑدہی ٹی کشمیر نا ویل اتون اوار ڈیہہ نا جم سلامتی نا حالیت آتیا گپ وتران کننگا۔ داوخت آ علی امین گنڈاپور پارے کہ بھارت مقبوضہ کشمیر اٹی انسانی حق انا بدترین خلاف ورزی کننگ ءِ، بھارت مقبوضہ کشمیر نا ڈیموگرافی ءِ بدل کننگ نا کوشست کننگ ءِ۔ جہانی برادری بھارت ءِ مقبوضہ کشمیر اٹی انسانیت نا برخلاف گندہ انگا ڈوہ آن تورے۔ علی امین گنڈاپور پارے کہ پاکستان اقوام متحدہ نا قرارداد آتا رداٹ کشمیر نا ویل انا پرامن ایسری ءِ خواہک، حکومت لائن آف کنٹرول آ شاری آبادی نا رکھ و سلامتی کن 3ارب روپئی نا ڈٹ انا بناءِ کرینے، آزاد کشمیر نا مچ آ آبادی ءِ ہیلتھ کارڈ تسونن۔ علی امین گنڈاپور پارے کہ بنجائی حکومت گلگت بلتستان نا چندی بشخ آتے ٹی شونداری کن 370ارب روپئی نا شونداری ڈٹ آتا بناءِ کرینے، میگا شونداری پیکج گلگت بلتستان نا زرگزرانی شونہالی کن گیم چینجر جوڑمریک۔ جرمن سفیر داوخت آ پارے کہ گلگت بلتستان اٹی سیل و سوات نا شونداری کن کروک آ حکومتی گام گیج اہم پک مریک، جرمن حکومت گلگت بلتستان نا راجی و زرگزرانی شونداری ٹی کمک کننگ ءِ۔ اوڑدہی ٹی گلگت بلتستان اٹی ہائیڈرو بجلی نا پیدوار نا گمان تیا ہم گپ وتران کننگا۔ جرمن سفیر پارے کہ جرمنی نا حکومت گلگت بلتستان نا اقتصادی و راجی بشخ اٹ پین کمکاری کن تیارءِ۔ وزیر امور کشمیر پارے کہ گلگت بلتستان نا شونداری کن درملکی زرکاری نا است بڈی ءِ کینہ۔ حکومت درملکی زرکارآتے ہروڑنا آسراتی فراوان کننگ ءِ۔
