اسلام آباد۔ 09جون (اے پی پی) پاکستان کسٹمز نا کنڈآن کسٹمز ریونیو ٹی ودکی کن گام گیج آتا چرجوئی برجاءِ وخت اس کہ اسمگل مروک گڑاتا برخلاف گام گیج آتے ٹی نمان ترندی بسنے۔ ترجمان ایف بی آر اے پی پی ءِ پارے کہ کسٹمز ریونیوٹی ودکی کن گام گیج آتا گچین نتیجہ مون آ بننگ ءِ۔ پاکستان کسٹمز اینخو مالی سال انا اولیکو یانزدہ تُواٹی 672ارب روپئی نا کسٹمز ڈیوٹی دوئی کرے وخت اس کہ تخوک آ ہدف 565ارب روپئی ئس، برجامالی سال انااولیکو 11تُواٹی ہدف آن 107ارب روپئی 19درسدزیات ریونیو دوئی مسنے۔ مئی 2021ء ٹی 64ارب روپئی نا کسٹمز ڈیوٹی دوئی مس وخت اس کہ تخوک آ ہدف 57ارب روپئی ئس۔ ہنداوڑ تُوئی بنداوتیا12درسد زیات کسٹمز ڈیوٹی دوئی مس۔ ترجمان پارے کہ اسمگلنگ نا برخلاف گام گیج آتاہم گچین نتیجہ مون آ بننگ ءِ۔ مئی نا تُو اٹی2.6ارب روپئی نا اسمگل مروک گڑاتے ضبط کننگا ہرا تدوک آ سال مئی نا مقابلہ ٹی74درسد زیات ءُ۔ تدوک آ سال مئی ٹی 1.5ارب روپئی نا گڑاتے ضبط کننگاسس۔ مالی سال انا اولیکو یانزدہ تُواٹی ضبط مروک گڑاتا کچ اٹی 29 درسد نا ودکی مسنے۔ جولائی آن ہلیس مئی اسکان نا مد اٹی 52.5ارب روپئی نا اسمگل مروک گڑاتے ضبط کننگا ہراکہ تدوک آ سال 40.8ارب روپئی ئسر۔ ترجمان پارے کہ ان لینڈریونیو و کسٹمز نا کنڈآن ہلوک آ موثر انفورسمنٹ گام گیج آتا سوب اینخومالی سال 175ارب روپئی نا ودکی ریونیو دوئی مسنے۔ 175ارب روپئی نا ودکی ریونیو ٹی ان لینڈ ریونیو کم و ود 100ارب روپئی دوئی کرینے۔داانفورسمنٹ گام گیج آتے ٹی بقایہ جات آتیان بیدس دوئی مروک آ ریکوری، موثرآڈٹ،سیلزخراج نا گچین مانیٹرنگ، پی او ایس تون گنڈوک ریٹیلرز، خراج نیٹ انا تالانی و ودہولڈنگ خراج آتا گچین مانیٹرنگ اوار ءِ۔ ہنداوڑ پاکستان کسٹمز نا کنڈآن ہم موثرانفورسمنٹ و انتظامی گام گیج آتا سوب آن اینخو مالی سال 75ارب روپئی نا ودکی ریونیو دوئی مس۔ داگام گیج آتے ٹی چاہ، ٹیر، ٹیکسائل، الیکٹرونک، پام آئل و پٹرولیم مصنوعات آتا برخلاف اینٹی اسمگلنگ آپریشن اوار ءِ۔
