اسلام آباد۔ 08جون (اے پی پی) بنجائی وزیر حوالکاری وشینکاری چوہدری فواد حسین پارینے کہ گچین کاری اصلاحات نا باندات آ اپوزیشن نا سلاہ نا انتظارءِ، اوورسیز پاکستانی تے وونٹ انا حق تننگ کن مسلم لیگ (ن) سنجیدہ اف، دابابت مسلم لیگ (ن) نا موقف نا مذمت ءِ کینہ، بنجائی کابینہ نا دیوان اٹی پاکستانی نژاد کینیڈین خاہوت نا خون نا ترندی اٹ مذمت ءِ کننگا، ہرا مسلمان ملک آتے انتہاپسندی نا طعنہ خلکرہ، اوتینے اسہ اوار ہریر، وزیراعظم عمران خان اسلاموفوبیا غا دنیا نا چکار ءِ کرفینے، اسلاموفوبیا دیکی راج اٹ سرایت کرینے، ساڑی حکومت 60آن زیات ادارہ غاتا سروک تعینات کرے، حکومت غٹ تعیناتی تے میرٹ آ کرینے، طارق ملک ءِ نادرا نا چیئرمین، انفارمیشن گروپ نا سینئر آفیسر مبشر حسن ءِ اے پی پی نا ایم ڈی، عمرحبیب لودھی ءِ ڈائریکٹر یوٹیلیٹی اسٹورزکارپوریشن آف پاکستان تعینات کننگ نا منظوری ءِ تننگانے۔ مستین نا حکومت آک قومی ادارہ غاتے سُروآنباربھس و بربادکریر، ریلوائی کن ایم ایل ون ڈٹ پورو مننگ آریلوائی نظام گچین مریک، پیپلزپارٹی و مسلم لیگ (ن) چناتیانبار اسہ ایلو تون جنگ تننگ ءُ، مسلم لیگ (ن) و پیپلزپارٹی تون گچین کاری اصلاحات آ ہیت کننگ خوانہ۔ داخیال آتا درشانی ءِ او سے شنبے نادے آ وزیراعظم نا کماشی ٹی بنجائی کابینہ نا دیوان آن پد میڈیا ءِ حوال ترسا کرے۔ بنجائی وزیر حوالکاری وشینکاری چوہدری فواد حسین پارے کہ بنجائی کابینہ نا دیوان اٹی ٹرین شکست و کینیڈاٹی اسلاموفوبیا نا گواچی مروک آ پاکستانی خاہوت نا روح انا ثواب کن دعاپاتیا کننگا۔ اوپارے کہ وزیراعظم عمران خان امت مسلمہ نا اسٹ انگا راہشون ءِ ہراوار وار اسلاموفوبیا غان دنیا ءِ پیش بروک آ پوسکن آ تنکی تا کنڈآ چکار کرفے، کینیڈاٹی پیش بروک آ واقعہ وزیراعظم نا گڑتی تا اسہ پین شاہدی اسے، نن خنانن کہ ہراوڑاٹ پاکستانی مسلمان تے شست کننگا، کینیڈاٹی پاکستانی خاہوت ءِ ہرابہیمانہ وڑاٹ کسفنگا، نن اونا ترندی اٹ مذمت ءِ کینہ و اسہ وار ولدا دیکی ملک آتا چکار ءِ داکنڈآ کرفنگ خوانہ کہ دیکی ٹی ودوک آ اسلاموفوبیا نا توننگے و اونا سوب آتیا کاریم کننگ نا گرج ءِ۔ دنیا نا مسلم ملک آتے بنداوپرستی نا طعنہ تروک آتے تینا زنچک اٹ ہلسا ہُننگ نا گرج ءِ۔ اوپارے کہ اسلاموفوبیا دیکی معاشرت اٹ سرایت کرینے، بدبختی اٹ خار آ مبنی فلاسفی ٹی مسلمان تا برخلاف اسہ پورو ءُ منظرنامہ اس بدل مننگ ءِ، داڑآننے بھاز فکر ءِ، ہنداخاطرآن وزیراعظم اسہ وار آخا کیہی وار ہیت کرینے و دیکی حکمران و سرکڑدہ غاتا داکنڈآ چکارکرفینے۔ اوپارے کہ تدوک آ دے ننا الیکشن کمیشن تون میٹنگ مس، داڑآ کابینہ ءِ حوال تننگا، ننا چار بنداوی باندات ئسر ہراڑآ الیکشن کمیشن تون اوڑدہی کننگا۔ تدوک آ سال اکتوبر آن الیکٹورل ریفارمز نا بل قومی اسمبلی ٹی ءِ، نن انتظار کننگ اُن کہ اپوزیشن داڑآ تینا سلاہ ءِ ایتے و داالیکٹورل ریفارمز ءِ امنا کے یا مستردکے۔ داتم اسکان نن خنانن کہ مسلم لیگ (ن) عدالت اٹی پٹیشن دائرکرینے وپارینے کہ اوورسیز پاکستانی تے وونٹ انا حق ملنگپ۔ دااسہ است ہسونی نا ہیت اسے۔ داڑآ ننا پوزیشن پیدوار ءِ، نن اوورسیز پاکستانی تے وونٹ انا حق تننگ خوانہ، داسہ نن پیپلزپارٹی نا موقف نا انتظار ءِ کننگ اُن۔ ن لیگ پٹیشن فائل کرسا اوورسیز پاکستانی تا بارواٹ تینا سلاہ نا درشانی ءِ کرینے۔ اوپارے کہ اینو پاکستان نا کرنٹ اکاؤنٹ نسخان آن پیشن ءِ، اینو ڈالر نا قدر کم مننگ ءِ، دانا بھلا سوب اوورسیز پاکستانی تا ترسیلات آک ءُ ہرافتے اوفک پاکستان آ گدریفنگ ءُ۔ اوورسیز پاکستانیک ہراخاہوت آتون گنڈوک ءُ و ہمو خاہوت آک ہرا اوورسیز پاکستانی تا کنڈآن مون تروک آ پیسہ غاتے اٹ پاکستان نا تہہ ٹی کاریم کننگ ءُ، نن غٹ اوورسیزپاکستانی تے پاکستان نا بھلا خاہوت نا اسہ المی ءُ جزو اس تکنہ۔ بدبختی ءِ کہ ن لیگ موقف ہلک کہ اوورسیزپاکستانی تے وونٹ انا حق تننگپ نن اونا ترندی اٹ مذمت ءِ کینہ۔ بنجائی وزیر حوالکاری پارے کہ ہراتسکان ای وی ایم نا تعلق ءِ، اوڑآ ٹیکنالوجی پارٹ و الیکشن کمیشن نا 36کنڈیشن پورو مسنو،م مسہ کمپنی مینو فیکچرز اسٹیج آٹو و وزارت سائنس و ٹیکنالوجی الیکشن کمیشن ءِ ڈیموپیش کیک، ہندا ہفتہ ہی دا پراسیس پورو مریک۔ اوپارے کہ وزارت حوالکاری نا کنڈآن ای وی ایم نا نا 500مشین تا آرڈر تننگ نا سلاہ غا سجفنگ انگ ءِ تانکہ پریس کلب و بارکونسل تا الیکشن ای وی ایم آ کرفنگ اٹ آسراتی تننگ مرے۔ بنجائی وزیر حوالکاری پارے کہ چیئرمین کابینہ کمیٹی ٹرانسپورٹ اینڈ لاجسٹکس نا کنڈآن اسہ بنائی رپورٹ اس کابینہ ٹی پیش کننگا۔ وزیراعظم علی زیدی ءِ پارت کرینے کہ داڑآ ترندی اٹ کاریم کننگے، ننا ٹرانسپورٹ و لاجسٹکس نا پالیسی زوت آن زوت نافذ کننگے۔ وزیر کانود کریمنل لائر یفامرز(فوجداری قوانین) نا بابت پیش رفت آن وزیراعظم ءِ معلومدار کرے، وزارت کانود داچرجوئی ٹی اسہ جامع دستاویز اس تیارکرینے، وزیراعظم نا منظوری آن پد پوسکن آ فوجداری کانود اٹ اصلاحات نافذ کننگک۔ اسٹیٹ لائف انشورنس کارپوریشن نا پیڈ اپ کیپیٹل اٹ ودکی نا سلاہ ئس منظور کننگانے۔ فرسٹ وومن بینک انا بورڈ آف ڈائریکٹرز نا انڈیپنڈنٹ ڈائریکٹرز وچیئرمین نا تعیناتی نا ہم منظوری ءِ تننگا۔ نجیب آگرہ والا فرسٹ وومن بینک انا پوسکن آ چیئرمین مریک۔ بشریٰ احسان، صبیحہ سلطان، اکبرعلی، وجاہت رسول خان ونغمانہ عالمگیر ہاشمی اونا بورڈاٹی اوار ءُ۔ دابورڈ انا پورو مننگ آن فرسٹ وومن بینک انا نجکاری نا اسہ اہم ءُ شڑت اس پورو مسنے اوکان پد فرسٹ وومن بینک انا پرائیویٹائزیشن نا عمل ترندی اٹ مون آ کاہک۔ کانچن موٹرز کراچی نا ڈغارتے اپارٹمنٹ آتا تفنگ کن کاریم اٹ اتنگ، پاکستان کوارٹرزو جمشید کوارٹرز کراچی نا ری جنریشن پلان نا منظوری نا ایجنڈاءِ موخر کننگانے۔ عامرمحی الدین بی ایس 20سیکرٹریٹ گروپ ءِ چیف ایگزیکٹو آفیسر پاکستان ہاؤسنگ فاؤنڈیشن تعینات کننگانے۔ اسلام آباد کیپیٹل ٹیریٹری لوکل گورنمنٹ نا رولز ءِ سی سی ایل سی آ گدریفنگانے۔ جسٹس (ر) ضیاء پرویز ءِ کمیشن آف انکوائری بے گواہ بندغ آتے ٹی بطور تعینات کننگ نا منظوری ءِ تننگانے۔ دانشست 27 دسمبر 2020ء آ جسٹس (ر) غوث محمد نا کزیت نا سوب آن خورک مسوسس۔ کابینہ اقتصادی رابطہ کمیٹی نا 21مئی 2021، 26مئی 2021ء و 2جون 2021ء نا فیصلہ غاتیا سجفے و اوفتے پک کرے۔ داوخت آ 17ملین بندغ احساس پروگرام آن فائدہ ہرفنگ ءُ۔ داپروگرام ءِ پین گچین کننگ کن داناڈیٹاءِ ڈیجیٹلائز کننگ انگ ءِ۔ احساس پروگرام اٹ شفافیت اتنگ کن اودے پورو وڑاٹ ڈیجیٹلائز نظام نا رداٹ چلیفنگ انگ ءِ۔ دانا 91درسد سروے پورو مسنے، 100درسد سروے زوت پورو مریک اوکان پد داڑآن پین مخلوق فائدہ ہرفنگ کیک۔ کورونا نا اولیکو ریسہ ٹی اسہ کروڑ 70لکھ خاہوت آتے ٹی 180ارب روپئی بشخنگا۔ جاپان و امریکہ غان پد احساس پروگرام دنیا نا مسٹ میکو بھلا پروگرام ءِ ہرادے پاکستان چلیفنگ ءِ۔ بنجائی وزیر حوالکاری پارے کہ خاص وڑاٹ پنجاب وخیبرپختونخوانا بابت نیٹ ہائیڈل پرافٹس نا باندات ایسر نا چاری ئس، اوطے مسنے۔ بروک آ شش تُو اٹی نیٹ ہائیڈل پرافٹس نا زرتس نا عمل بناکیک، اسہ کمیٹی اس جوڑ کننگانے، پنجاب و کے پی کے 91 ارب روپئی نا نیٹ ہائیڈل پرافٹ نا زرتس نا کاریم نا بناءِ کننگانے۔ کابینہ کمیٹی نجکاری نا 21مئی 2021ء نا دیوان اٹی تروک آ فیصلہ غاتے پک کننگانے۔ ہنداوڑ سی سی ایل سی نا 2جون 2021ء نا فیصلہ غاتے پک کننگا۔ کابینہ ٹیل فون انڈسٹریز آف پاکستان ءِ نیشنل ریڈیو ٹیلی کمیونیکیشن کارپوریشن (این آر ٹی سی) ءِ ٹرانسفر کننگ نا منظوری ءِ تسنے، دابابت پیش بروک آ باندات آتا ایسری کن بین الوزارتی کمیٹی اس جوڑ کننگانے۔ 2006ء آن ہری پور اٹی ٹیل فون انڈسٹریزبند تموک ءِ، داڑآ این آر ٹی سی اسہ پوسکن ءُ ٹیکنالوجی سٹی اس آباد کننگ خواہسکہ، داسہ دا این آر ٹی سی ءِ تننگانے۔ ٹیلیفون انڈسٹریز آف پاکستان نا ملازم آتے ہم این آرٹی سی ٹی ضم کننگ انگ ءِ۔ اسہ ملازم اسے ہم کشنگ پننگ انگ ءِ۔ عمرحبیب لودھی ءِ ڈائریکٹر یوٹیلیٹی اسٹورزکارپوریشن آف پاکستان دُوارہ تعینات کننگ نا منظوری ءِ تننگا۔ ہراتم نن اقتدار اٹی بسن تو یوٹیلیٹی اسٹور تے ارب آ روپئی نا نسخان ئس، داوخت آ یوٹیلیٹی اسٹورزکارپوریشن تا سیل 100 ارب روپئی ءِ۔ اولیکو وار اسہ بھلو وخت اسے آن پد یوٹیلیٹی اسٹورزکارپوریشن نسخان آن پیشن بسنے۔ اوپارے کہ مستین اٹ قومی ادارہ غاتے بے دڑدی اٹ بھس کننگا۔ نن 60آن زیات مخلوق ءِ ادارہ غاتا سروک تعینات کرینن، اسٹ اسے نا بارواٹ ہم پاننگ مفک کہ او سیاسی تقرری ءِ و نئے تقرری اس عدالت اٹ چیلنج مسنے۔ اوپارے کہ غٹ تقرری تے بے کچ شفاف وڑاٹ کننگانے۔ اوپارے کہ انفارمیشن گروپ نا آفیسر مبشر حسن ءِ ایم ڈی اے پی پی تعینات کننگانے۔ بنجائی کابینہ تاجکستان ءِ کورونا دین نا مقابلہ ءِ کننگ کن انسانی بنداو تیا امداد فراوان کننگ نا منظوری ءِ تس۔ نوید اسماعیل ءِ کے الیکٹرک اٹ بطور باسک تعینات کننگ نا منظوری ءِ تننگا۔
