وزیرخارجہ شاہ محمود قریشی نا کینیڈین ہائی کمشنر وینڈی گلمور تون گپ وتران

اسلام آباد۔ 08جون (اے پی پی) وزیرخارجہ شاہ محمود قریشی پارینے کہ کینیڈا ٹی پاکستانی نژاد خاہوت نا خون اسلاموفوبیا و دہشت گردی نا پیدوار درور ءِ۔ اسلاموفوبیا نا بابت جہانی کہول آ گچین گام گیج آتا گرج ءِ۔ داہیت ءِ او پاکستان اٹی تعینات کینیڈین ہائی کمشنر وینڈی گلمور تون گپ وتران کرسا پارے ہرا سے شنبے نادے آ وزارت خارجہ ٹی اوڑتون اوڑدہی کرے۔ اوڑدہی ٹی کینیڈاٹی پاکستانی نژاد خاہوت تون پیش بروک آ دڑدی آ واقعہ، اسلاموفوبیا نا ودوک آ کچ اتون اوار تین پہ تینی است خواہی نا باندات آ گپ وتران کننگا۔ وزیر خارجہ پارے کہ کینیڈا ٹی پاکستانی نژاد خاہوت تون پیش بروک آ است ہسون واقعہ غا بھاز رنجیدہ اُن و پاکستانی نژاد خاہوت نا خون اسلاموفوبیا و دہشت گردی نا پیدوار درور اسے۔ شاہ محمود قریشی کینیڈین وزیراعظم جسٹن ٹروڈو نا مثبت ردعمل نا ستاءِ کرے و پارے کہ دیکی ٹی مسلمان تا برخلاف ودوک آ خارتس واقعہ، اسلاموفوبیا نا ساڑی گری نا شاہدی ءِ۔ اوپارے کہ وزیراعظم عمران خان و ای بطور وزیرخارجہ جہانی کہول آاسلاموفوبیا نا ودوک آ رجحان نا برخلاف توار بڑزکرسا بننگ ءِ۔ کینیڈن ہائی کمشنر دااست ہسون واقعہ غا است ہسونی نا درشانی ءِ کرسا، کینیڈین حکومت نا کنڈآن داواقعہ ٹی پورو جاست وپاست و زموار آتا برخلاف سخت کارروائی نا باوری کرفے۔