اسلام آباد۔ 08جون (اے پی پی) دفترخارجہ کینیڈا نا شار اونٹاریو ٹی اسلاموفوبیا نا واقعہ نا سخت مذمت ءِ کرساپارینے کہ دا است ہسون واقعہ منظم وڑاٹ ودوک آ اسلاموفوبیا نا درشانی ءِ۔ اومیت ءِ کینیڈین کمامدارآک داوحشیانہ عمل نا مرتکب بندغ آتے اوفتے اوفتاکروک نا سزاترفک۔ سے شنبے نادے آ ترجمان اونٹاریوٹی کینیڈا ٹی پاکستانی نژاد خاہو ت تون است ہسون واقعہ نا سخت مذمت ءِ کرسا اودے اسلاموفویبا نا واقعہ گوندا وزہمی خاہوت تون ہمدردی نا درشانی ءِ کرینے۔ ترجمان پارے کہ اوٹاواٹی پاکستانی ہائی کمیشن و ٹورنٹو ٹی قونصلیٹ جنرل کیس انا راستکی تے ہُننگ کن تعلقدار کینیڈین کمامدارآتون رابطہ ٹی اُن تانکہ دا وحشیانہ عمل نا مرتکب بندغ آتے اوفتے اوفتا کروک نا سزا ترفنگ ءِ پک کننگ مرے۔ ترجمان پارے کہ ٹورنٹو ٹی ننا قونصل جنرل متوفی خاہوت نا اُراغاہنا و اوفتے تون ہمدردی و ہڑزخواہی کرے و ہرممکن کمک فراوان کننگ نا سلہ ہم خلک۔ ترجمان پارے کہ دا است ہسون واقعہ منظم وڑاٹ ودوک آ اسلاموفوبیانا درشانی ءِ۔ ترجمان پارے کہ کینیڈانا وزیراعظم پیدوار کریسس کہ اسلاموفوبیا کن ننا کمیونٹی ٹی ہچ ءُ جاگہ اس اف۔ داوڑنا واقعہ غاک داہیت ءِ پک کیرہ کہ جہانی برادری ءِ اواری اٹ بین المذاہب ہم آہنگی و بقائے باہمی کن کاریم کننگ نا گرج ءِ۔
