اسلام آباد۔ 08جون (اے پی پی) صدر مملکت ڈاکٹر عارف علوی فیک نیوز نا ودوک آ لعنت نا حوصلہ شکنی آ زورشاغانے انتئے کہ داراج اٹ بے چیٹی و مخلوق کن فریشانی نا سوب مریرہ، اوپارے کہ میڈیا اخلاقی قدر انا مون آ دننگ و غلط حوال تا تالانی ءِ توننگ کن تینا کڑد ءِ ادا کے، پیمرا حوال آتا آجوفراوانی ءِ پک کرسا معلومات، تعلیم و سیل سوات نا آب ءِ گچین کے۔ داخیال آتا درشانی ءِ او چیئرمین پیمرا محمد سلیم بیگ تون اوڑدہی ٹی کرے۔ اوڑدہی ٹی چیئرمین پیمرا صدر مملکت ءِ پاکستان اٹ الیکٹرانک میڈیانا آجو مون آ دننگ و آسراتی فراوان کننگ نا بابت تینا ادارہ نا سالانہ رپورٹ 2019-20ءِ پیش کرے۔ اوملک اٹ سُچا و سہی حوال آتا فراوانی کن کروک آ گام گیج آتے ہم تالان کرے۔ داوخت آ گپ وتران کرسا صدر مملکت ڈاکٹر عارف علوی پارے کہ راج ءِ دروغ انگا خبرتا چیلنج مون تروک ءِ و داتعلقدار اسٹیک ہولڈر آتا زمواری ءِ کہ او فیک نیوز آتا تالانی آن پاناد کیر انتئے کہ داڑآن مخلوق ءِ ویل مون تروئی تمک۔ صدر مملکت پارے کہ غلط حوال تالان کننگ اسلام نا روح آن چپ ءِ و دامیڈیا ہاؤس آتا ایڈیٹوریل بورڈ و عالم دین تا اخلاقی زمواری ءِ کہ او دروغ انا خبرتا چیلنج اتون مون تننگ کن مخلوق اٹ آگاہی ودی کننگ و اوفتا راہشونی ءِ کننگ کن تینا کڑد ءِ اداکیر۔ اوچیئرمین پیمرا غا زور شاغاکہ الیکٹرانک میڈیا نا کمک اٹ بے کنڈہلوک، سہی و پک کروک حوال آتا تالانی ءِ پک کے، تانکہ فیک نیوز آتا توننگ ءِ پک کننگ مرے۔ صدر مملکت پیمراناکارکڑد نا ستاءِ کرے و چیئرمین پیمراءِ تینا ہروڑنا کمکاری نا باوری کرفے۔
