اسلام آباد۔ 08جون (اے پی پی) اسپیکر قومی اسمبلی اسد قیصر پارلیمانی رپورٹرایسوسی ایشن نا دز کش مروک آ عہدیدار آتے سرسہبی اٹ تینا مد ءِ پورو کننگ آ مبارکبادی ترساپارینے کہ پارلیمانی صحافت نا پارلیمانی کارروائی ٹی بھلو اہم ءُ کڑد اسے۔ پارلیمانی رپورٹرآتے کاریم کننگ کن سازگار چاگڑد اس فراوان کننگ آ یخین تخنہ۔ اوسے شنبے نادے آ پی آر اے نا دزکش مروک آ باڈی و سینئر صحافی تا شرف اٹ چیئرمین سینیٹ نا کنڈآن تروک آ دے انا اِرغ آن تران کریکہ۔ اسپیکر پارے کہ پرنٹ آن الیکٹرانک وداسہ ڈیجیٹلائزیشن میڈیا نا دورءِ و ولدا سوشل میڈیا ترندی اٹ واکدار مرسا مون آ بننگ ءِ۔ سوشل میڈیا نا بننگ آن پد داسہ خبروخت انا انتظار ءِ کپک بلکن خبرنا رفتار سپرسونک جہازآنبار ترند ءِ، میڈیا ڈیجیٹلائزیشن ءِ شفاف دروشم اس تننگ ہم اسہ بھلو چیلنج اسے۔ اوپارے کہ دامچ آحالیت آتے ٹی پی آراے تینا کڑد ءِ اداکے، قومی اسمبلی سیکرٹریٹ اوفتا کمک ءِ کیک و پی آر اے دابابت پیس آن ہم فائدہ دوئی کننگ کیک ہموڑے باقاعدہ کورس، سیمینار، ورکشاپ کرفنگ مریک۔ اوپارے کہ کنے آن سرپرست اعلیٰ پی آراے حافظ طاہر خلیل کیہی وار خواست کرے کہ پی آر اے نا آفس ءِ منتقل کننگے و اسہ بھلو آفس اس تننگے انتئے کہ پارلیمانی رپورٹر آتا کچ ودنگ ءِ ای اودے باوری کرفیوہ کہ اسمبلی سیکرٹریٹ دابابت اوفتے تون پورو کمک کیک۔ پارلیمانی رپورٹرز صحافت چارمیکو تمبہ و پارلیمنٹ نا بشخ ءِ اوفتے کن ننا درگہ غاک ملوک ءُ نم زیات آن زیات پٹ وپول نا کاریم ءِ کبو۔ ننا لائبریری ءِ کاریم اٹ اتبو انتئے کہ میڈیا، الس و حکومت نا نیام اٹ پاش آن پا ش کڑد اداکیک۔ اوپارلیمانی رپورٹرز ایسوسی ایشن نا دزکش مروک آ باڈی ءِ مبارکبادی تس و پارے کہ ہراکہ پوسکن آ باڈی بریک اوفتے تون ہم ننا کمک برجاسلک۔
