اسلام آباد۔ 08جون (اے پی پی) بنجائی وزیر سائنس و ٹیکنالوجی شبلی فراز پارینے کہ پٹ وپول آن پاکستانی الس و مچ آ انسانیتءِ بایدے فائدہ رسینگے، حلال اتھارٹی آن ننا برآمد آتے ٹی ودکی مریک، اسلامی ملک آتے اواری اٹ دابشخ اٹی ریسرچ ءِ ودفنہ۔ داہیت آتے او سے شنبے نادے آ کامسٹیک آڈیٹوریم اٹی”حلال ٹیسٹنگ لیبارٹری اس امر جوڑ کین“ نا سرحال آ مسہ دے ئی ہیلکاری کورس آن تران کرساپارے۔ بنجائی وزیر پارے کہ ننا ایمان ءِ کہ اسلام اسہ طرز زند ءِ، اسلام انسانیت کن خور انا آب ءِ طے کیک۔ شبلی فراز پارے کہ وڈی خوری حلال اف، حلال نا مطلب کانودنا رداٹ کاریم کننگ ءِ۔ اوپارے کہ جہانی کہول آ ہِننگ نا نسبت، خور انا آب اٹ جان جوڑ ءِ پک کننگ آ چکار کننگ نا گرج ءِ۔ لیبارٹری تیٹی خور انا حلال یا حرام مننگ نا تعین ءِ کننگ نا پورو لائخی بایدے مرے۔ بنجائی وزیر حلال صنعت تون گنڈوک غٹ ادارہ غاتا لائخی تیٹی ودکی کن وڑوڈول اس تیار کننگ آ زور شاغا وپارے کہ یونیورسٹیک ہم داعمل اٹ بشخ ہلیر۔ اوپارے کہ پاکستان اٹ مستین کروک آ پٹ وپول و اونا اطلاق نا نیام اٹ بھاز بھلو پرخ اسے۔ اوداہیت آ زور شاغا کہ پٹ وپول آن پاکستانی الس و مچ آ انسانیت ءِ بایدے فائدہ رسینگے۔ بنجائی وزیر پارے کہ وزارت سائنس و ٹیکنالوجی تینا ادارہ غاتے سوگو کننگ کن کاریم کننگ ءِ، نن ملک اٹ جوڑ لیبارٹری تے پین گچین کننگ کن کاریم کننگ اُن، یونیورسٹی تا لیبارٹری تے گچین کننگ نا گرج ءِ۔ شبلی فراز پارے کہ ساڑی آ حکومت ملکی برآمدآتے ٹی ودکی کن متاماری کننگ ءِ، داچرجوئی ٹی حلال اتھارٹی آن ننا برآمدآتے ٹی ودکی مریک۔ دامسخت کن نن اسلامی ملک آتون اواری اٹ دابشخ اٹ ریسرچ ءِ ودفنہ، ولے ننے برآمدآتے ٹی ودکی اٹ خور انا کوالٹی ءِ ہم گچین کروئی مریک۔ بنجائی وزیرپارے کہ وزارت نا غٹ تعلقدار بشخ آتا مارکیٹ و یونیورسٹی تتون بایدے کوآرڈنیشن مرے۔ کوآرڈنیٹر جنرل کامسٹیک پروفیسر ڈاکٹر محمد اقبال چوہدری پارے کہ حلال نا منظوری و سند تننگ اسہ ہندن ءُ بشخ اسے ہراٹی نن بھاز مون آ ہِننگ کینہ۔ اوپارے کہ حلال کاروبار 20درسد نا حساب اٹ ودنگ ءِ و مسلم ملک آتے ٹی حلال سرٹیفکیشن تا ہچ ءُ بھلو ادارہ اس اف۔ ڈاکٹر چوہدری پارے کہ نن کامسٹیک اٹ سائنس آمبنی کمرشلائزیشن و او آئی سی باسک ریاست آتے ٹی سائنس نا اطلاق نا بابت لائخی ءِ ودفنگ آ کاریم کننگ اُن۔ اوپارے کہ اینو نا کورس انا سرحال پاکستان و او آئی سی نا صنعتی شونداری نا بابت ءِ۔ سیکرٹری جنرل، سٹینڈرڈز اینڈ میٹرولوجی انسٹی ٹیوٹ فاراسلامی ملک آک، ترکی احساس اوویٹ ئسک پاریر کہ ننے جہانی کہول آمقابلہ کننگ کن اسیجائی آب اس تیارکننگ و اوڑآعمل کننگ نا عزم انا گرج ءِ۔ بنائی دیوان آن عصمت گل خٹک، ڈائریکٹر جنرل، پاکستان نیشنل ایکریڈیشن کونسل، اختراے بوگیو، ڈائریکٹر جنرل، پاکستان حلال اتھارٹی، وپروفیسر ڈاکٹر سید غلام مشرف، پروفیسر پنجویانی سینٹرکراچی ئسک تران کریر۔ بنائی سیشن اٹ 800بشخ ہلوک آک آن لائن بشخ ہلکر و 80بندغ جندانا وڑاٹ بشخ ہلکر۔ دا3دے ئی پروگرام پنچ شنبے نادے آ 10جون آ چٹک۔
