اسلام آباد۔ 08جون (اے پی پی) وزیراعظم نا نمائندہ خصوصی مذہبی ہم آہنگی و دے ٹک نیامی و چیئرمین پاکستان علماکونسل حافظ محمد طاہر محمود اشرفی کینیڈاٹی مسلم خاہوت آ دہشت گردانہ جلہو نا ترندانگا لوز آتے ٹی مذمت ءِ کرسا پارینے کہ داوڑنا واقعہ پاش آن پاش دہشت گردی و دین اسلام آن ناواقفیت ناشاخسانہ ءِ، غم انا داساہت اٹ زہمی خاہوت تون یکجہتی نا درشانی ءِ کینہ۔ ٹویٹر آ جاری بیان اٹی حافظ طاہرمحمود اشرفی پارے کہ بدبختی اٹ دیکی اسلاموفوبیانا گواچی مسنے ہرانا سوب آن داوڑنا واقعہ غاک پیش بننگ ءُ۔ اوپارے کہ جہانی برادری ءِ اسلاموفوبیا نا مقابلہ ءِ کننگ کن یکجامننگ نا گرج ءِ ولدا گڑادنیا ٹی اسلام نا حقی دروشم ءِ مون آ اتنگ اٹ کمک رسینگک، دنیاءِ پاہنگ نا گرج ءِ کہ اسلام امن نا دین ءِ و اسلام نا دہشت گردی یا شدت پسندی تون ہچ ءُ تعلق اس اف۔حافظ طاہر محمود اشرفی پارے کہ وزیراعظم عمران خان مدام اسلاموفوبیانا چٹفنگ کن ہیت کرینے۔ وزیراعظم جہانی برادری ءِ اسلاموفوبیانا ویل اتون مون تننگ کن مدام کمک نا سلہ خلکونے۔ حافظ طاہر محمود اشرفی پارے کہ کینیڈا نا زہمی مسلم خاہوت تون پورو ہمدردی نا درشانی ءِ کینہ و اومیت کینہ کہ حکومت کینیڈا زہمی خاہوت ءِ انصاف نا فراوانی ءِ پک کیک۔ اوداگمان نا ہم درشانی ءِ کرے کہ حکومت کینیڈا پین وخت اس داوڑنا واقعہ غاتا توننگ کن پبی گام گیج کیک۔
