سکھر۔ 08جون (اے پی پی) گھوٹکی نا خڑک ٹرین شکست اٹ زوال کروک آتا کچ 62مس و 100بندغ ٹھپی ءُ، ٹھپی مروک آتے ٹی 10بندغ نا حالیت نازرک ءِ، ٹرین نا کیرغ آن اختہ مسافر آتے کشنگ کن ریسکیو آپریشن ارٹ میکو دے آ ہم برجاءِ، پاک فوج انا ورناک و رینجرکارندہ غاک کمکی کارروائی و ریسکیو آپریشن اٹ لگوک ءُ۔ ڈپٹی کمشنر گھوٹکی نا پاننگ ءِ کہ انجن نا کیرغ آن بوگی تیٹی داتم اسکان گڑاس بندغ اختہ ءُ ہرافتے کشنگ نا کاریم برجاءِ۔ سرجم حوال آتا رداٹ تدوک آ دے کراچی آن سرگودھاغا ہنوک آ 17اپ ملت ایکسپریس ڈہرکی و رریتی نا نیام اٹ پنسا اِرابشخ اٹ بشخنگا و پٹڑی آن دڑنگا اوکان پدایلو کنڈآن بروک آ لاہور آن کراچی آ ہنوک آ ٹرین 36ڈاون سرسید ایکسپریس برسا ملت ایکسپریس نا تموک آ بوگی تیا لگاسس، شکست اٹ سے شنبے نا سہب اتون 9بجہ اسکان زوال کروک آتا کچ 62اسکان سرمسنے ہرافتا لاش آتے کشنگانے۔ شکست اٹ 100بندغ ٹھپی مسنو۔ ارٹ میکو دے آ ہم ریسکیو آپریشن برجاءِ۔ ریسکیو آپریشن اٹ پاک آرمی نا ورناک بشخ ہلنگ ءُ۔ ڈپٹی کمشنر گھوٹکی عثمان عبداللہ نا پاننگ ءِ کہ داتم اسکان شکست اٹ 62بندغ زوال کرینو، پین زوال کننگ نا گڑتی ءِ انتئے کہ ریلوائی انجن نا کیرغ آن داتم اسکان بوگی تیٹی گڑاس بندغ اختہ ءُ۔ 100بندغ ٹھپی ءُ ہرافتے ٹی 10نا حالیت نازرک ءِ۔ زیات ٹھپی مروک آتے پنوعاقل فوجی چھاؤنی ٹی و سی ایم ایچ آ گدریفنگانے۔ ایلو کنڈآ ایدھی مرکز سکھر نا انچارج گل مہر نا رداٹ ٹھپی مروک آتے طبی امداد کن ایدھی ایمبولینس نا کمک اٹ چندی ہسپتال آتے ٹی میرپورماتھیلو، ڈھرکی، اوباڑوو رحیم یارخان آ گدریفنگانے۔ شکست اٹ زوال کروک آ بندغ آتا 35میت آتے ایدھی ایمبولینس نا کمک اٹ ہسپتال آ مون تسر و اوکان پد ہسپتال آتیان اوفتا باوہ پیرہ ئی خلق آ مفت ایدھی ایمبولینس آتا کمک اٹ پنجاب نا چندی علاقہ فیصل آباد، لودھراں، وہاڑی،جھنگ، راولپنڈی، ٹوبہ ٹیک سنگ آ روانہ کننگانے۔ ایلو ہرامیت آتا خواجہ غاک داسکان بتنو اومیت آتے اوباڑو ہسپتال آن ایدھی ایمبولینس نا کمک اٹ رحیم یارخان سردخانہ غا گدریفنگانے۔
