سکھر۔ 08جون (اے پی پی) گھوٹکی نا خڑک ٹرین شکست آن پد اسہ ٹریک ءِ کلیئر کننگانے، زکریا ایکسپریس شکست نا جاگہ غان روانہ مس، ارٹ میکو ٹریک داسکان کلیئر متنے۔ ترجمان ریلوائی سکھر داؤد ملک نا رداٹ گھوٹکی نا خڑک ٹرین شکست نا ہند آ ریلوائی نا اپ لائن ءِ سہب انا 9بجہ ءُ 55منٹ آ کلیئر کننگانے۔ اپ لائن کلیئر مننگ آن پد کراچی آن پنجاب آ ہنوک آزکریا ایکسپریس ٹرین سہب انا 10بجہ ءُ 25منٹ آ شکست نا جاگہ غان روانہ مس۔ ترجمان ریلوائی سکھر داؤد ملک اے پی پی تون گپ وتران کرساپارے کہ شکست نا جاگہ غا فی الحال اسہ ٹریک ءِ کلیئر کننگانے وخت اس کہ ایلولائن ءِ کلیئر کننگ اٹ زرس وخت لگک انتئے کہ شکست نا گواچی اسہ انجن نا کیرغ آن داسکان مخلوق ڈبنگوک ءُ، اوفتے کشنگ کن ریسکیو آپریشن برجاءِ۔ ترجمان نا پاننگ ئس کہ ہراتم اسکان ارٹ میکو ٹریک کلیئر مفک ہموتم اسکان ہڑتوم آ کنڈآتا ٹرین تے اسہ ہی ٹریک آ چلیفنگک، داچرجوئی ٹی ریلوائی انتظامیہ سلابت کننگ ءِ۔ شکست نا سوب آن ریلوائی ٹریک 30گھنٹہ اسکان بلاک ئس۔
