اسلام آباد۔ 07جون (اے پی پی) وزیراعظم عمران خان کم خڑچ اُراتا الس اسکان رسینگ کن معلومداری نا فراوانی و درخواست آتا ہلنگ کن موبائل یونٹ نا بناءِ کرے۔ موبائل یونٹ پوسکن آ پاکستان ہاؤسنگ اتھارٹی و نیشنل بینک آف پاکستان نا شریداری اٹ مخلوق ءِ کم خڑچ ہنکینی ڈٹ آتے کن وام تا دوئی کننگ اٹ آسراتی فراوان کیک۔ پین داکہ موبائل یونٹ پرائم منسٹر ہاؤسنگ اسکیم نا رداٹ وام تیکن ون ونڈو آپریشن فراوان کیک۔ بنائی وڑاٹ موبائل یونٹ راولپنڈی، اسلام آباد و کیبی آ علاقہ غاتے ٹی آسراتی فراوان کیک۔ اوکان پد مچ آ پاکستان اٹ داوڑنا موبائل یونٹ جوڑ کننگک۔ داکان بیدس موبائل یونٹ کورونا دین اٹی بینک آتیا زور ءِ کم کننگ اٹ ہم کمکار جوڑ مریک۔ وزیراعظم نیشنل بینک انا کنڈآن موبائل یونٹ نا جوڑ کننگ نا گام گیج نا ستاءِ کرسا پارے کہ کم کٹیائی کروک آ بندغ آتے جند انا چھت انا فراوانی ٹی ہرممکنہ آسراتی فراوان کننگ حکومت نا اولیت ءِ۔ اوداوخت آ زور شاغاکہ بینک آتا کنڈآن الس ءِ اُراتے کن وام انا فراوانی ءِ ممکنہ حداسکان آسان جوڑ کننگے و اوفتاکمکاری ءِ پک کننگے۔
