ملتان۔ 07جون (اے پی پی) وزیرخارجہ مخدوم شاہ محمود قریشی پارینے کہ پن بجلی و شمسی توانائی نا پیدوار ءِ ودفسا بجلی نا ودوک آ نہاد آتے توننگ مریک و حکومت داچرجوئی ٹی پبی گام گیج کننگ ءِ۔ بروک آ دہ سال اٹی دہ پوسکن ءُ ہائیڈل ڈٹ پورو مریرہ۔ دافتیان ودی مروک آ بجلی نئے بیرہ داکہ اڑزآن مریک بلکن ننا سسٹم اٹ اوار مرسا بجلی نا جم پیدوار آ اثرمرتب کیک۔ داخیال آتا درشانی ءِ او دوشنبے نادے آ نشتر میڈیکل یونیورسٹی ٹی ریٹروفٹنگ ڈٹ انا بناءِ کننگ نا وخت آ گپ وتران کرسا کرے۔ اوپارے کہ داڈٹ آتا رداٹ چارہزار متکن آ پنکھہ و دُوانزدہ ہزار لیٹ آتے ریٹروفٹنگ نا کمک اٹ بدل کننگانے۔ چارکروڑ 60لکھ روپئی خڑچ انا دا ڈٹ آن مسہ نیم کروڑ روپئی نا بچت مریک۔ وزیر خارجہ پارے کہ نن الس نا پیسہ غاتے بچفسا جان جوڑی و دوائی تا فراوانی آ خڑچ کننگ کینہ۔ اوپارے کہ چلڈرن ہسپتال اٹی ہم اینو سولر سسٹم نا بنداو ءِ تخنگانے۔ مسہ نیم کروڑ روپئی نا خڑچ آن دا ڈٹ جولائی نا ایسر اسکان پورو مریک و داڑآن سالانہ اسہ کروڑ 75لکھ روپئی نا بچت مریک۔ اوپارے کہ داسسٹم نا معیاد 25سال ءِ۔ نن تینا خڑچ ءِ اِراسال اٹ دوئی کینہ و بروک آ 23سال اسکان مفت بجلی دوئی کینہ۔ اوپارے کہ کبین آ بجلی ءِ اڑزآن کننگ اسہ چیلنج اسے۔ حکومت وزیراعظم عمران خان نا ویژن و راہشونی ٹی داویل اتون مون تننگ کن پوسکن ءُ ڈٹ بندی کرینے تانکہ الس ءِ ریلیف تننگ مرے۔ ننا چکار تھرمل، ہائیڈل و سولر آٹے۔ اوپارے کہ پن بجلی کن نن تون کیہی وارخواہی ارے۔ گلیشئرآن دیر مروک آ دیر پن بجلی ٹی کاریم اٹ اتنگ مریک۔ ہنداوڑ ننا داڑے دے انا روشنائی شمسی توانائی کن کاریم اٹ اتنگ مریک۔ شمسی توانائی نا نظام مہالو کبین ئس ولے داسہ داہم کم خڑچ مسنے۔ پن بجلی و شمسی توانائی نا پیدوار بجلی نا ودوک آ نہاد آتے ٹی اڑاند شاغک۔
