اسلام آباد۔ 07جون (اے پی پی) بنجائی وزیر سائنس و ٹیکنالوجی سینیٹر شبلی فراز پارینے کہ الیکٹرانک و آئی وونٹنگ نا مون آدننگ کن الیکشن کمیشن تون کمکاری برجاسلک، وزیراعظم عمران خان ناتغ ءِ کہ ملک اٹ گچین کاری شفاف وڑاٹ مرے۔ داخیال آتا درشانی ءِ او دوشنبے نادے آ الیکشن کمیشن نا پیشن بنجائی وزیر حوالکاری وشینکاری چوہدری فواد حسین، وزیراعظم ناسلاہکار پارلیمانی امور ڈاکٹر بابر اعوان، وزیراعظم نا سلاہکار احتساب و داخلہ بیرسٹر شہزاداکبرتون اوار پریس کانفرنس آن تران کرساکرے۔ اوپارے کہ وزیراعظم عمران خان نا تغ ءِ کہ ملک اٹ گچین کاری شفاف وڑاٹ مرے، داڑآن ملک اٹ جمہوریت سوگو مریک و الس نا حقی گچین مروک آ نمائندہ غاک اسمبلی آ سرمریرہ۔ اوپارے کہ وزارت سائنس و ٹیکنالوجی الیکٹرانک مشین نا باندات آ دے و نن کاریم کننگ ءِ۔ غٹ تعلقدار کڑدہ غاتون بروک آ گچین کاری تے شفاف کنننگ کن خڑکی رابطہ ءِ۔ نن خوانہ کہ بروک آ مروک آ لس گچین کاری تا شفافیت آ مچ آ قوم ءِ اعتبارمرے۔ وزیراعظم ناسلاہکار پارلیمانی امور ڈاکٹر بابراعوان پارے کہ سپریم کورٹ الیکشن کمیشن ءِ الیکٹرانک وونٹنگ نا بارواٹ پاریسس ولے الیکٹرانک وونٹنگ کن ملک اٹ کانود ساڑی الوکہ ہنداخاطرآن دابابت آرڈیننس جاری کرے۔ داآرڈیننس اینو دوشنبے نادے آ قومی اسمبلی نا دیوان اٹی پیش کننگک۔ اوپارے کہ پیشن ناملک رہینگوک آ پاکستانی تے وونٹ انا حق تننگ آہم الیکشن کمیشن تون ہیت مسنے۔ پیشن نا ملک پاکستانیک ملک انا محسن ءُ۔ اوفتے شریدار اقتدار اٹ اوار کننگ المی ءِ۔ اوپارے کہ نن خوانہ کہ 2023ء نا گچین کاریک الیکٹرانک وونٹنگ مشین نا کمک اٹ مریر۔ اپوزیشن و الیکشن کمیشن تون اوار غٹ تعلقدار کڑدہ غاتون سلابت کننگ اُن۔ غٹ شفافیت نا مخ تف ءُ۔ اوپارے کہ مہالو حلقہ غاتے ٹی پری پول دھاندلی آراوزنا کمک اٹ و گچین کاری تیٹی دھاندلی ضلعی آفیسر آتا کمک اٹ کننگاکہ۔ نن مستین نا دانظام ءِ بدل کننگ خوانہ۔ اوپارے کہ الیکشن کمیشن تون پگہ چارشنبے نادے آ اوڑدہی مریک۔ اوپارے کہ گچین کاری نا نتیجہ غاتیان پد دھاندلی نا دوبہ خلسا کننگا۔ چندی فارم ملپننگ نا غاومریک۔ نن اصلاحات نا کمک اٹ کانود نا رداٹ شفافیت ءِ پک کننگ کن ٹیکنالوجی آ مبنی گچین کاری خوانہ۔ اوپارے کہ قومی اسمبلی و سینیٹ اٹ کانود سازی کن اکثریت دوئی ءِ ولے غٹ سیاسی جماعت آتون سلابت خوانہ انتئے کہ دا 22کروڑ الس نا وونٹ آتا معاملہ ءِ۔ نن وونٹ آتا دُزی و داڑیلی نا کسر ءِ توننگ خوانہ۔ اوپارے کہ اپوزیشن نا سلاہ ءِ بخیر اٹ پانہ۔ داآرڈیننس اٹ الیکشن کمیشن ءِ مالی وڑاٹ وتواجہ جوڑ کننگ نا شق ہم اوار ءِ۔
