اسلام آباد۔ 07جون (اے پی پی) بنجائی وزیر ریلوائی اعظم خان سواتی گھوٹکی نا خڑک اِرامسافر ریل گاڈی تا شکست نا جاگہ غا سرمس و ریسکیوآپریشن نا چاروکی ءِ کرے۔ وزیر ریلوائی شکست نا جاگہ نا دورہ غان پد ٹھپی تا جان پڑسی کن ہسپتال آ ہم ہنا۔ داوخت آ گپ وتران کرسا اوپارے کہ غٹ ادارہ غاک ریسکیو آپریشن اٹ لگوک ءُ۔ ٹھپی مروک آتے خڑک انا ہسپتال آ گدریفنگانے۔ اعظم خان سواتی پارے کہ پاکستان ریلویز، پاک فوج اناورناک، رینجرز، ضلعی انتظامیہ، ریسکیو1122و سندھ پولیس ریسکیو آپریشن اٹ لگوک ءُ۔ المی مشینری و ازباب آتا کمک اٹ بوگی تے ٹی اختہ مسافر آتا ریسکیو ناعمل ایسری نا خڑک ءِ۔ ریلوائی ٹی ودوک آ شکست آتا توننگ کن دمدستی گام گیج کننگک۔ یات سلے کہ ٹریک آن ریلیف ٹرین و کرین نا کمک اٹ ملبہ غاتے اینک کننگ نا کاریم برجاءِ۔ ٹرین شکست اٹ زوال کروک آتا کچ 32مس وخت اس کہ ٹھپی مروک آتا مسافرآتا کچ 80نا خڑک ءِ۔ ٹرین شکست اٹ زوال 20مسافر و 60ٹھپی بندغ آک تعلقدار ہسپتال اوباروٹی و ڈسٹرکٹ ہسپتال گھوٹکی ٹی 4زوال و 2ٹھپی ساڑی ءُ۔ سول ہسپتال میرپور متھیلوٹی 8زوال مسافر و 12ٹھپی ساڑی ءُ۔ شیخ زید ہسپتال رحیم یارخان آن داسکان معلومداری ہلنگ انگ ءِ۔ بنجائی وزیر ریلوائی نا خصوصی پارت آ ریلوائی انتظامیہ نا کنڈآن شکست نا جاگہ غا سلوک غٹ مسافرآتے دیر انا بوتل، جوس و کن و خور بشخنگا۔ پاکستان ریلوائی داڈکھ انا ساہت اٹ تینا مسافر و اوفتا خاہوت نا پبی خیال ءِ تخنگ نا پورو کوشست کننگ ءِ۔ پاکستان ریلوائی خواست کرینے کہ صبر و تحمل اٹ پاکستان ریلوائی انتظامیہ تون کمک کیر۔ ریلوائی مسافر آتا آسراتی کن کراچی، سکھر، فیصل آباد و راولپنڈی ٹی ہیلپ سینٹرجوڑکرینے۔
