کراچی۔ 06جون (اے پی پی) گورنر سندھ عمران اسماعیل پارینے کہ اقوام متحدہ نا چاگڑدی پروگرام (یواین ای پی) نا شریداری اٹ جہانی یوم چاگڑد2021ء نا مہمانداری ءِ کننگ اسہ بھازبھلو شرفمندی و موسمیاتی بدلی و گلوبل وارمنگ نا اثرآتے کم کننگ اٹ پاکستان نا کوشست آتا اعتراف ءِ۔ داخیال آتا درشانی ءِ او یک شنبے نادے آ گورنر ہاؤس اٹی جہانی یوم چاگڑد نا چرجوئی ٹی اڈ ہلوک آ اسہ دود اسے آن بحیثیت مہمان خاص تران کرساکرے۔ داپروگرام نا بست وبند ءِ کلین اینڈ گرین کراچی(سی جی کے) نا شریداری اٹ کننگاسس۔ کوآرڈنیٹر سی جی کے فرح رحمان ہم دود اٹی ساڑی ئس۔ گورنر سندھ مستی پارے کہ گورنر ہاؤس اٹی شاری جنگل آتا بابت شجرکاری مہم نا رداٹ اسہ ایکڑ آ تالان 30جتا درخت مہالو آن خلکونو ہرافتیان 12درخت میوہ غاتا و 18ایلو وڑتا ئسر۔ اوپارے کہ شاری جنگل آتاکاریم وزیراعظم نا 10بلین درخت آتا سونامی پروگرام نا چرجوئی ٹی کننگاسس۔ عمران اسماعیل پارے کہ صوبہ ٹی مینگروز نا نیال بھلو کچ اسے ٹی خلنگ انگ ءِ انتئے کہ وزیراعظم عمران خان نا پیدوارنظریہ و تغ ءِ کہ اوکراچی ءِ گرین سٹی ٹی بدل کینہ۔ اوپارے کہ بیرہ جان جوڑ چاگڑدی نظام نا ذریعہ ہی نن مخلوق نا خوشی تیٹی ودکی کننگ کینہ، آب وہوانا بدلی تا مقابلہ ءِ کننگ کینہ۔
