لاہور۔ 06جون (اے پی پی) اسپیکر قومی اسمبلی اسد قیصر پارینے کہ مچ آدنیاغانبار پاکستان ءِ چاگڑدی بدلی نا بھاز خطرہ مون تروک ءِ ہرانا سوب آن دیر انا کمتی کون آ ویل پیش بننگ ءِ، صوبہ غاتے ٹی دیر انا بشخنگ نا باندات پارلیمنٹ اٹ جوانی اٹ بایدے ایسرمرے، پاکستان نا شمار ہموملک آتے ٹی مریک ہرادے گلوبل وارمنگ نا بھاز خطرہ مون تروک ءِ، حکومت نا بلین ٹری سونامی ڈٹ مرحلہ وار برجاءِ ہراڑآن چاگڑدی کچٹی ٹی کمتی واقع مریک، اپوزیشن فوڈ سیکورٹی، کورونادین و دیر انا بشخنگ نا باندات آ حکومت تون بایدے تفے، است خواہی ءِ کہ اسمبلی نا تقدس ءِ بحال تخر، حکومت و اپوزیشن اسہ ایلو نا نقہ نظرنا بایدے شرف ءِ کیر، اپوزیشن آن خواست کیوہ کہ او ملکی ویل آتیا شرہ کن پارلیمنٹ نا فورم ءِ کاریم اٹ اتے، اسمبلی فلور آ آجوفیصلہ کیوہ شہباز شریف ءِ کیہی وار پروڈکشن آرڈرجاری کرین۔ داخیال آتا درشانی ءِ او یک شنبے نادے آ مزار اقبال ؒ آحاضری آن پد میڈیا تون گپ وتران کرسا کرے۔ او پارے کہ پاکستان تون اوار مچ آدنیا ءِ چاگڑدی بدلی نا چیلنج مون تروک ءِ، ہرانا سوب آن ملکی آبی وسیلہ غاتے ٹی کمتی واقع مننگ ءِ، ننے بروک آ چین تے ساف ستھراچاگڑد اس فراوان کننگ کن شجرکاری کروئی مریک، حکومت نا بلین ٹری سونامی ڈٹ مرحلہ وار برجاءِ ہراڑآن چاگڑدی کچٹی ٹی کمتی واقع مریک۔ اسپیکر قومی اسمبلی پارے کہ صوبہ غاتے ٹی دیر انا بشخنگ نا باندات، پارلیمنٹ اٹ جوانی اٹ بایدے ایسرمرے۔ حکومت و اپوزیشن اسہ ایلونا نقطہ نظرنا بایدے شرف ءِ کیر۔اپوزیشن آن خواست کیوہ کہ اوملکی ویل آتیا شرہ کن پارلیمنٹ نا فورمءِ کاریم اٹ اتے۔اپوزیشن فوڈ سیکورٹی، کورونادین، ملکی زرگزران، دیر انا بشخنگ نا باندات آ سیاست بایدے سیاست کپ بلکن ملکی ویل آتا ایسری کن حکومت تون تفے۔ اوپارے کہ امریکہ تون بالی پٹ تننگ آن نئے معاہدہ اس مس نئے دابابت حکومت نا پلان اس ارے،وزیراعظم عمران خان نا مننگ تون کس اس سجفپ کہ پاکستان تینا اڈہ غاتے امریکہ ءِ ایتک۔ اوپارے کہ پاکستانی تا است کشمیری تتون دھڑکک حکومت اولیکو وار کشمیر آ مسہ قرارداد امنائی وڑاٹ منظور کرے۔ فلسطین اٹ اسرائیلی ظلم انا برخلاف جہانی کہول آ توار بڑز کرین و قومی اسمبلی آن امنائی قرارداد منظور کرین۔
