لاہور۔ 06جون (اے پی پی) وزیراعظم نا خصوصی کمکار سیاسی ابلاغ ڈاکٹرشہباز گل پارینے کہ مسلم لیگ (ن) پورووڑاٹ خاموش مسنے، حکومت ءِ اوڑآن ہچ ءُ خطرہ اس اف، وزیراعظم عمران خان اصول آتیا سمجھوتہ کپک، ہربندغ نا بے پرخ احتساب مریک،ملکی زرگزران گچینی نا کنڈآ ہِننگ ءِ،م برآمدآک 13.5درسد آن ودسا 21.5درسد آ سرمسنو،م پاکستان نا تاریخ اٹ پٹرولیم مصنوعات آتا ریکارڈ بہامسنے،م مسلم لیگ (ن) والاک پار کہ اگہ زرگزران چلینگ پننگ ءِ تو پٹرولیم مصنوعات دیر اس ہلنگ ءِ۔ داخیال آتا درشانی ءِ او یک شنبے نادے آ داڑے پی آئی ڈی ٹی پریس کانفرنس آن تران کرساکرے۔ ڈاکٹر شہباز گل پارے کہ مسلم لیگ (ن) نا حکومت ملکی خزانہ ءِ بھا ز بے وڑ حالیت اٹ ہلاسس ہناسس ہرانا سوب آن پاکستان تحریک انصاف نا حکومت ءِ مشکل آتون مون تروئی تما، پاکستان نا داخہ خراب زرگزرانی حالیت مہالو اسل الوکہ ہراوڑ مسلم لیگ(ن) نا حکومت ہلاسس ہناسس۔ اوپارے کہ (ن) لیگ نا دور اٹ برآمد آتا کچ کم ئس، 18ارب ڈالر نا درملکی کوڑی کم مرسا 9ارب ڈالر آ بس، بجلی گھر 30درسد زیات زر آ خلنگا، زیات وام ہلنگ آن ملک خواتہ مننگ نا خڑک آ سرمس۔ ڈاکٹر شہباز گل پارے کہ پاکستان تحریک انصاف حکومت ءِ سنبھالاتو ملک انا زرگزرانی حالیت بھاز خراب ئس، وزیراعظم عمران خان نا سخت خواری آن ملک انا زرگزرانی حالیت پدریسہ گچین مننگ ءِ، صنعت نا پہیہ چلینگ نا بناءِ کرینے، ملکی برآمدآک سینزدہ ءُ نیم درسد آن ودسا 21ءُ نیم درسد اسکان سرمسنو۔ کنسٹرکشن کن مزور رسینگ پننگ ءِ، فیصل آباد اٹی مزور نا تنخواہ مسہ ہنداخہ مسنے، ہڑدے ئی گڑاتا نہاد آتے ٹی ہم کمتی بننگ ءِ۔ اوپارے کہ اللہ تعالیٰ نا فضل وکرم اٹ فصل آتا پیدوار اٹی خاطرخواہ ودکی مسنے، خولم و کمند نا فصل آک گچین مسنو و انشاء اللہ بروک آ سال کموندنا فصل داکان ہم گچین مریک۔ اوپارے کہ فصل آتیان پد لائیو اسٹاک آ خاص چکار کننگ اُن انتئے کہ انسان تا بنداوی گرج لائیو اسٹاک تون گنڈوک ءِ، ورناتے کولڈ سٹوریج جوڑ کننگ کن وام تننگ انگ ءِ۔ اوپارے کہ (ن) لیگ والاک حکومت نا گچین پالیسی تے ہم تنقید نا شست کننگ آن پدی مفسہ۔ اوپارے کہ مئی ٹی 16لکھ 92ہزار ٹن پٹرولیم مصنوعات آتا استعمال مس ہراپاکستان نا تاریخ نا غٹ آن بھلا نمبرءِ۔ اوپارے کہ اگہ زرگزران گچین ہِنپننگ ءِ تو ولدا داخہ بھلو کچ اسے ٹی پٹرولیم مصنوعات دیر اس ہلنگ ءِ۔ اوپارے کہ اپوزیشن تنقید برائے تنقید نا جاگہ غا حکومت نا مثبت کاریم تے ہم ہرے۔ اوپارے کہ مسلم لیگ (ن) پورو خاموش مسنے حالانکہ بجٹ خڑک بننگ آ اپوزیشن جوان شورشرابہ کیک، حکومتی نمائندہ غاتا کنڈآن زیات پریس کانفرنس مننگ ءِ وخت اس کہ (ن) لیگ نا کنڈآن پورو خاموشی ءِ۔
