راولپنڈی۔ 06جون (اے پی پی) بنجائی وزیر ہوابازی غلام سرور خان پارینے کہ الس دشمنک ملکی شونداری نا درپے ءُ، بے سہبی مخالف آتا مقدر مریک، ڈغاراٹی دیر انا کچ اٹی خطرناک کمتی نا سوب آن دیر انا کاختی نامون ءِ توننگ کن پبی وجامع گام گیج برجاءِ، حکومتی گام گیج آتا سوب آن بروک آاِراسال اٹی راولپنڈی ٹی تفنگوک آ پنچ ڈیم تا پوروی آن مچ آ ضلع ٹی دیراناکاختی چٹک۔ یک شنبے نادے آ داڑے اے پی پی تون خصوصی گپ وتران کرسا بنجائی وزیر ہوابازی غلام سرورخان پارے کہ مخالف آک ملکی شونداری نا درپے ءُ وخوارہ کہ الس ءِ مثبت پالیسی تا بھرم تے ٹی تاخیر مرے و الس دشمن ایجنڈا ءِ سوگوی ملے ولے داوڑنامخلوق ءِ بے سہبی تون مون تروئی تمک۔ اسہ سوج اسے نا ورندی ٹی بنجائی وزیر پارے کہ چاہندارآتارداٹ 2025اسکان پاکستان اٹی دیرانا کمتی نا بھلاویل لاحق مننگ کریکہ ولے حکومت دوراندیشی نا درشانی ءِ کرسا دیراناتنکی تون مون تننگ کن گچین حکمت عملی اس کرے و چنکاڈیم تا تفنگ نا کاریم ءِ ترند کرے۔ اوپارے کہ ضلع راولپنڈی ٹی دیر انا کمتی نا مون ءِ توننگ و کشاری ڈغارتے سیراب کننگ کن 05ڈیم تا تفنگ مارچ 2023اسکان پورو کننگک۔ داڈیم تیٹی ددھوچھہ ڈیم، مھوٹہ موھڑہ ڈیم، پاپین ڈیم، مجاھد ڈیم و چہان ڈیم اوار ءُ۔ بنجائی وزیر غلام سرور خان پارے کہ چہان ڈیم ایسری آ سرمسنے و دانا کیچمنٹ ایریاٹی دیر انا بھلوکوڑی اس ساڑی ءِ۔ داڈیم آن ضلع راولپنڈی نا 42یوسیز ءِ دیرفراوان کننگک۔ بنائی وڑاٹ واٹرسپلائی موٹرز، اِرابھلاواٹرٹینک آتا تفنگ و پیپ لین تا خلنگ نازوت بناءِ کننگک ویونین کونسل کوٹھ کلاں، یونین کونسل لکھن، یوسی چک جلال دین، یوسی دھمیال، یوسی موہری غزن نا لکھ آ نفوس آ تالان آبادی تے دیر انا فراوانی ءِ پک کننگک۔ پنجاب حکومت پوسکن آ مالی سال 2021-22کن ضلع راولپنڈی نا داپنچ پوسکن آ ڈیم تا تفنگ و پوروی کن فنڈ جتا کننگ نا منظوری ءِ تسنے۔ اسہ سوج اسے ناورندی ٹی بنجائی وزیر غلام سرورخان پارے کہ داڈیم تا پوروی آن ہراڑے راولپنڈی ٹی دیرانا کاختی چٹک ہموڑے ڈغاراٹی دیرانا کچ ءِ بڑزکننگ اٹ ہم کمک رسینگک۔
