اسلام آباد۔ 06جون (اے پی پی) وزیراعظم نا خصوصی کمکار چاگڑد ملک امین اسلم اپوزیشن جماعت آتے سلہ خلکونے کہ پاکستان نا آخبت و بروک آ چین تیکن میثاق چاگڑدکننگے، اینخوناسال جولائی ٹی ورلڈ بینک انا کمک اٹ 12لکھ ڈالر نا خڑچ آن ڈٹ آتا بناءِ کننگ اُن ہراڑآن جنگل آتا رکھ اکن پین نوکری نا وارخواہی ودی مریک، دنیا چاگڑدی بدلی تتون مو ن تننگ کن پاکستان نا کوشست آتا ستاءِ کننگانے۔ پریس انفارمیشن ڈیپارٹمنٹ اٹ پریس کانفرنس آن تران کرسااوپارے کہ اقوام متحدہ نا سیکرٹری جنرل، چین نا صدر، برطانیہ نا وزیراعظم، ورلڈ اکنامک فورم نا صدر و اقوام متحدہ نا چاگڑدنا بابت ادارہ غاتا نمائندہ غاتون مچ آ دنیا غان چاگڑد نا جہانی دے انا وخت آ پاکستان اٹ اڈہلوک آ دود اٹی تینا کلہوآتے ٹی اوفک پاکستان نا کنڈآن چاگڑد نا بابت کروک آ گام گیج آتا ستاءِ کرینو ہراڑآن دنیا ٹی سوز ہلالی بیرک و سوزپاسپورٹ ءِ شرفمندی مس، ہنداپوسکن آپاکستان ءِ۔ اوپارے کہ پاکستان نا 10ارب سونامی ٹری ڈٹ انا ستاءِ کرسا جہانی راہشونک پاریر کہ پاکستان چاگڑد نا گچینی کن سرکڑدہ ئی کڑد ادا کننگ ءِ۔ اوپارے کہ دادود اٹی جرمنی نا چاگڑدنا وزیر تینٹ ٹیل فون کرسا بشخ ہلنگ نا است خواہی نا درشانی ءِ کرے۔ جرمنی نیچربانڈ انا بابت ننکن اہم ءُ ملک اسے اوڑتون دارداٹ ہیت وگپ چلینگ انگ ءِ۔ اوپارے کہ داپاکستان کن بھلو شرفمندی اسے کہ جہانی راہشونک پاکستان نا کنڈآن کروک آ گام گیج و عمران خان نا عزم انا ستاءِ کرینو۔ اوپارے کہ او اپوزیشن ءِ سلہ خلیک کہ او دامعاملہ غا تینا بروک آ چین تیکن سجفے، غٹ جماعت آتے میثاق چاگڑد نا سلہ خلینہ ہراوزیراعظم عمران خان نا ویژن نا ڈیک مرے۔ اوپارے کہ پائیدار و بروک آ چین تیکن سوگو پاکستان تون تفر۔ امین اسلم پارے کہ جہانی کہول آ وزیراعظم عمران خان نا بلین ٹری ڈٹ ءِ پذیرائی ملنگ ءِ، چاگڑدی بدلی نا چیلنج آتون مون تننگ کن جہانی کہول آ کوشست آتا گرج ءِ، پاکستان ہمو ملک آتے ٹی اوار ءِ ہرا براہ راست جہانی تہوش انا گواچی ءُ۔ اوپارے کہ عمران خان ہرامشن نابناءِ کرینے بروک آچین تیکن اودے برجاتخوئی مریک۔ اسہ سوج اسے نا ورندی ٹی اوپارے کہ پاکستان تون دُوانزدہ چاگڑدی زون ءُ ہراڑے مچ آدنیاغان سیل و سواتیک بننگ کیرہ، پاکستان اٹی سیل و سوات نا بھلو وارخواہی ا س ساڑی ارے، خیبرپختونخوا نا حکومت سیل وسوات نا بابت پالیسی اس ہم ٹہیفینے ہراڑآن سیل و سوات شون ہلیک۔ اوپارے کہ گرین بانڈ چاگڑد دوست ڈٹ آتے کن نرم شڑت آتیا وام تا دوئی کننگ نا اسہ ذریعہ ءِ۔ دانا کمک اٹ دیری کوڑی تا تفنگ، الیکٹرک وہیکل نا ڈٹ اکن وام ملنگ کیک۔ اوپارے کہ نن ڈیم جوڑ کننگ خوانہ ولے ہمسایہ ملک بھارت اونا مخالفت ءِ کننگ ءِ و دادے جھیڑہ ئی جوڑ کننگ ءِ ہنداخاطرآن مالیاتی ادارہ غاتا کنڈآن دانا فنانسنگ اٹ مشکلات ئس۔ اوپارے کہ گرین بانڈ انا کمک اٹ ننے آسان شڑت آتیا وام تا دوئی کننگ ممکن مسنے، نن پنجا کروڑ ڈالر ہلنگ کن ہناسن ولے ننے 3ارب ڈالر تننگ نا پیشکش مس داسہ بھاز جوان ءُ گام گیج اسے۔ اسہ سوج اسے ناورندی ٹی اوپارے کہ ننے جنگل آتا رکھ اکن گارڈآتا کمتی مون تروک ءِ، داکمتی تون مون تننگ کن ورلڈ بینک 12لکھ ڈالرنا ڈٹ اس تسنے ہراڑآ جولائی آن کاریم بناکیک و دانارداٹ جنگل آتا رکھ اکن پوسکن ءُ ملازمت ایتنہ۔ اوپارے کہ برطانیہ، جرمنی و کینیڈاتون نیچربانڈ اکن ہیت وگپ چلینگ انگ ءِ۔ اوپارے کہ کابینہ غان کیہی سمری تامنظوری آن پد بیوروکریسی ٹی دافائل آک اختہ ءُ، نناورناک الیکٹرک موٹرسائیکل و رکشہ جوڑ کریر گاڈی جوڑ کننگ کن کاریم مننگ ءِ داپوسکن آ مارکیٹ ءِ پاکستان داڑآن فائدہ ہرفنگ کن تیار ءِ۔
